WILLEMSTAD.- Ayera parlamento a reuní ku promé minister Bernard “Ben” Whiteman i e Tim multidisiplinario riba e MOU ku a firma ku e kompania chines Guangdong Zhenrong Energy Co. LTD.
Minister Whiteman a splika ku un MOU ta un akuerdo di disponibilidat pa yega na algu. Den e MOU ku a firma tin un klóusula ku despues di 2 luna i atrobe 2 luna lo duna ‘follow up’. No ta korekto pa warda despues di 2 luna pa reakshoná. Esaki ta iresponsabel. E aspekto di garantisá kontinuidat, kupo di trabou klaridat despues di desèmber 2019, un gobièrnu responsabel mester buska solushon. Ta masha fásil pa sinta warda i laga ken bin konfrontá ku e realidat, sr. Whiteman a indiká. Ademas esnan ku resientemente den e Tim Multidisiplinario ku a biaha pa China tabata téknikonan.
Despues di 4 luna di “alargá”, e MOU ta kaduká. Aló ménos si ámbos banda yega na algu otro. Si despues di 4 luna no yega na algu nobo, nos no tin MOU.
Pa loke ta trata e MOU for di awor por mira ku e tin un aspekto sosial kuné. P’esei a papia ku tur ministerio lo duna kolaborashon pa kontenido di e MOU. Ora bai elaborá pa yega na kos konkreto, sektornan lo tene kuenta ku kosnan sosial i asuntu di zonifikashon, edukashon i tur aspekto ku gobièrnu ke tene kuenta kuné pa pueblo.
Pa loke ta trata modernisashon di bai for di fosil i bai energia alternativo, lo tin 80% di bahada di impakto riba medio ambiente kompará ku loke tin awor aki. E sobra 20% ta tratabel.
Mas aleu minister Whiteman a bisa ku tabatin un MOU intenshoná pa firma ku Venezuela i esei no a kristalisá pa vários motibu. Mirando ku 2019 ta tras di porta, i mirando no tabatin manera di yega akuerdo ku Venezuela despues di vários intento, a bai buska otro kaminda i a hasi mediante e MOU.
Modernisashon di refineria ta kosta 3.5 bion dòler. Segun minister Whiteman, e sa ku Guangdong Zhenrong Energy Co. LTD. i Venezuela a yega na akuerdo di traha den refineria. China ta risibí krudo for di Venezuela pa fiansa hasi na Venezuela.
E MOU ku a yega na dje ku Guangdong Zhenrong Energy Co. LTD. no tabata e promé opshon. A purba un MOU ku Venezuela i esei ta despues di 2 palabrashon ku presidente venezolano, sin a logra.
Refineria Isla a duna presentashon na Guangdong Zhenrong Energy Co. LTD. i nan a kana riba instalashon di refineria i tambe na Bullenbaai , minister Whiteman a bisa.
Bron: Extra