WILLEMSTAD. – Dia promé di yanüari durante e programa 60 minuts CBSN, ta pinta área di Karibe hopi korupto. E tópiko tabata basá riba negoshi lukrativo di pasport diplomátiko.
Nòmber di Francesco Corallo a bin dilanti den e programa aki komo un di e personanan ku ora el a keda arestá na Italia, e tabata den poseshon di un pasport diplomátiko.
E koresponsal Steve Kroft a pone dede riba un situashon peligroso den área di Karibe i ku a bira un industria di mas di 2 bion dòler.
Segun e reportahe, t’asina ku na e momentunan aki e pais Malta ta na kabes den benta di pasport diplomátiko. Pa un par di mion dòler, un hende por kumpra un pasport asina i den un tempu rekòr e ta kambia di nashonalidat i bira europeo i por biaha rònt mundu sin visa.
Pero e pais Dominica tambe ta haltu riba e lista aki i e loke ku ta hasi Dominica mas atraktivo, ta ku aki, e pasport ta kosta algun 100 mil dòler.
Durante e reportahe, e koresponsal ta hasi menshon ku área di Karibe su hendenan inkluso mandatarionan tin un historial di korupshon. Nan a hasi menshon tambe di paisnan manera Antigua, Grenada, St. Lucia ku ta paisnan ku fásilmente bo por yega na pasport diplomátiko.
Durante e entrevista e nòmber di Francesco Corallo a bin dilanti dia ku el a keda arestá na Italia na un okashon i ku el a saka un pasport diplomátiko i bisa ku e no por keda arestá, pa motibu di e pasport ku e tin ku tabata di Dominica.
Un parlamentario a duna di konosé ku nunka ántes el a yega di tende di Corallo te dia ku el a kai den brasa di hustisia na Italia den poseshon di un pasport diplomátiko di Dominica.
Bron: Extra