WILLEMSTAD.- Ekspolítiko Norbert George ayera a pèrdè un kaso ku el a entama kontra Radio Direct. George a eksihí un rektifikashon di e radio relashoná ku deklarashonnan ku periodista Richeron Balentien a hasi durante un transmishon di Radio Direct.

Wes a rechasá eksigensia di George i kondená George pa paga kosto di e proseso.

Segun abogado di Radio Direct, Olga Kostrzewski desishon di wes ta importante. ‘Spesialmente riba dia di prensa ( ku tabata ayera, EXTRA) ta importante ku nos sistema di derechi un biaha mas a konfirmá importansia di libertat di ekspreshon.”

E kaso ta relashoná ku un komentario ku Richeron Balentien a duna na radio riba dia 22 di yüni 2016. Segun Balentien, George komo ámtenar no a presentá su mes na trabou pa hopi tempu, pero el a keda sinta na kas. Balentien tabata di opinion ku George a haña salario ilísito.

Segun George deklarashon di Balentien no ta korekto i ta dañino i p’esei el a eksigí un rektifikashon. Wes a disidí ku deklarashon di Balentien ta basá riba dokumentunan ku ta públiko i verídiko.

Den e transmishon Richeron Balentien a bisa entre otro ku George a disidí pa sinta na kas, kobrando mei mion florin i na mesun momentu tin mamanan ku yunan na Kòrsou ku tin nesesidat grandi, pero tin falta sèn. Segun Balentien aktitut di George ta sumamente di lamentá i kondenabel. Balentien a konkluí ku George no tin bèrgwensa mas.

Wes a disidí ku palabra di Balentien ta kai bou libertat di opinion i di ekspreshon.

Segun Radio Direct komo medio di komunikashon mester ta posibel pa usa remarke kritiko ku por ta shòk komunidat. Segun Radio Direct esaki ta nesesario pa trese dilanti situashon inkorekto. Segun Norbert George Richeron Balentien i Radio Direct deliberadamente a daña su nòmber i nunka a duna George oportunidat pa defendé su mes.

Wes a bisa ku palabranan di Balentien ta ofendé George si, pero no ta ilísito. P’esei wes a rechasá eksigensia di George i kondená Norbert George pa paga kosto di proseso, ku ta den total 1500,- Naf.

Bron: Extra