WILLEMSTAD,- Presidente di Hunta Komisario di Banko Sentral di Kòrsou i St. Maarten Etienne Ys a splika ku ‘pa salbaguardiá integridat di Banko Sentral di Kòrsou i St. Maarten a duna órden pa presidente-direktor di Banko Sentral, Sr. Emsley Tromp, di forma inmediato stòp ku trabou pa banko i na mesun momentu duna órden pa stòp Tromp di drenta banko sentral.’

Ys a splika ku Tromp no por keda den funshon mas. ‘Pa mas ku un aña Banko Sentral a keda presidí dor sr. Tromp, ku tin problema ku hustisia. No ta un kos ku bo por mantené. E kara di e persona ku ta na kabes di banko mester ta un hende ku no tin e mínimo na duda di su integridat. Ta p’esei e konseho di hunta di komisario ta pa proponé gobièrnu pa duna sr. Tromp su retiro i pa buska un presidente nobo.’
Ys a splika ku e instituto di banko ta mas grandi ku tur hende. ‘Pasobra e tin ku mantené su nòmber intachabel.’

Segun Ys na e momentu aki Tromp lo no pasa screening. ‘Ta p’esei pa salbaguardiá integridat, tantu internashonalmente pero lokal tambe, nos a tuma e desishon. Pasobra ta supervisá otro institutonan. No mag di tin hendenan ku ta bou di investigashon pa un funshon asina. Pa nos ta sumamente importante pa salbaguardiá integridat di e banko.

Manera ta konosí hunta di Komisario di Banko Sentral di Kòrsou i St. Maarten a pidi gobièrnunan di pais di Kòrsou i pais St. Maarten pa retirá presidente Emsley Tromp. Hunta a duna Tromp oportunidat pa retirá promé ku promé di sèptèmber. Pero Tromp a ninga, asina Hunta di Komisario di Banko Sentral a duna di konosé.

Bron: Extra

‘Mi ta lamentá ku Tromp a ninga e solushon elegante ku nos a ofresé’

WILLEMSTAD,- ‘E situashon na Banko Sentral di Kòrsou i St. Maarten awor no ta aseptabel, ni pa Hunta di Komisario, ni pa Vermogengerechtigden. Nos a purba pa reglá e situashon na un manera elegante pa Emsley Tromp bandoná boluntariamente di su posishon. Pero el a skohe pa un otro opshon. Mi no ta konosé su motibunan pa hasi esaki.

Pero na mi opinion ta hopi di lamentá ku Tromp no a opta pa e salida elegante.’ Asina minister di Finansa Kenneth Gijsberta a splika ayera na EXTRA. ‘Ta mas ku opvio ku no tin niun posibilidat pa Tromp lo regresá komo direktor di banko. M’a splika Tromp hopi kla ku no tin duda, Tromp nunka no por bin bèk komo direktor di Banko.’

Gijsbertha a splika ku e solushon elegante a nifiká entre otro ku Tromp mes ta entrega su retiro i ku esaki e lo bin na remarke pa bai na vut. Pero enbes di apliká pa esei Tromp a opta pa presentá su mes na trabou djabièrnè pasá, sin bisa su doñonan di trabou. ‘Pasobra ora bo ta AO i bo ke bai bèk trabou, bo tin ku bisa bo doño di trabou, pero e no a hasié. Den e banko el a tuma desishonnan ku konsekuensianan hopi grave pa banko.’ Segun Gijsbertha, Tromp a duna un eks direktor, den e kaso aki sr. Hasselmeyer un kontrato nobo di 5 aña sin tene kuenta ku e mandatarionan nobo.

Gijsbertha: ‘Tromp a bai Banko. Su promé akshon tabata pa baha Alberto ‘Chos’ Romero komo presidente interino, i tuma desishon komo direktor. Entre otro el a firma un kontrakt di 5 aña pa Hasselmeyer. Pa kolmo Tromp a manda karta na abogado di Hasselmeyer, ku ta sr. Braam, bisando ku e por stòp ku prosedimentu na nòmber di Hasselmeyer pasobra Hasselmeyer a haña un kontrakt di 5 aña. I pa kolmo a skirbi ku Banko Sentral lo paga tur kostonan ku Hasselmeyer a hasi pa su kaso den korte.’

Pa Gijsbertha e pasonan di Tromp ta inkreibel. ‘Mi ta lamentá henter e situashon. Pero nos no tin otro opshon ku sigui ku e proseso ku por yega na retiro di Tromp.’

Bron: Extra

WILLEMSTAD,- E notisia ku Hunta di Komisario di Banko Sentral di Kòrsou i St. Maarten a pidi gobièrnunan di pais di Kòrsou i pais St. Maarten pa retirá presidente Emsley Tromp, a kousa bastante konsternashon den mundu finansiero di Kòrsou. Banda di e pidimentu pa retiro, a instalá un medida di órden kontra Tromp.

Esaki lo tin su konsekuensia negativo pa Banko Sentral di Kòrsou i St. Maarten, fuentenan for di sektor finansiero a splika. Tin miedu pa mas daño di imágen di Kòrsou.

Diferente hende ku ta preferá pa keda anónimo, ta referí na e entrevista ku Age Bakker a duna algun luna pasa, komo presidente saliente di Kolegio di Supervishon Finansiero. Den e entrevistanan ku Bakker a duna, el a menshoná situashon ku Banko Sentral spesífikamente komo un problema pa desaroyo di Kòrsou.

Bakker, ku e aña aki a sali despues ku mas ku 6 aña komo presidente di e Kolegio, den un di su entrevistanan a bisa ku ‘na niun pais na mundu ta eksistí un Banko Sentral ku no ta funshoná, manera Banko Sentral di Kòrsou i Sint Maarten (CBCS).’ Bakker a reakshoná riba e echo ku Presidente di Banko Sentral di Kòrsou i Sint Maarten Emsley Tromp ta sospechá den un kaso penal.

Bakker: ‘E situashon ta tarda demasiado hopi. Na niun pais na mundu ta eksistí un Banko Sentral ku no ta funshoná, manera Banko Sentral di Kòrsou i Sint Maarten. Kòrsou i Sint Maarten ta hunga ku kandela. Tambe ta hopi frustrante ku riba e dos paisnan ekonomia no realmente ta krese. Na promé instansia m’a kere ku esaki ta un konsekuensia di finansa di Gobièrnu. Awor mi ta di opinion ku ekonomianan kasi no ta krese, pasobra ta falta konfiansa.’

E problema pa falta di konfiansa ta nifiká ku desaroyo ekonómiko di Kòrsou a keda dañá dor di presensia di un presidente ku ta sospechoso den un kaso penal.

Bron: Extra

Retiro di Tromp probablemente lo bira un kaso den korte

WILLEMSTAD, – Minister di Finansa Kenneth Gijsbertha ta splika ku situashon aktual di Banko Sentral di Kòrsou i St. Maarten ta ku a prohibí Emsley Tromp pa drenta e banko i tambe a informá Tromp tokante e prosedura ku a kuminsá ku por yega na su retiro.

‘Tromp tin e derechi pa bin ku su argumentonan kontra e retiro. A base di su kontesta Hunta di Komisario lo disidí ki lo bira e siguiente paso.’

Segun Gijsberta for di e momentu ei tur kos lo por bai basta lihé. Pasobra si Hunta di Komisario, despues di a tende kontesta di Tromp, lo disidí pa sigui ku e proseso di retirá Tromp, e por bai korte pa bringa desishon di retiro. ‘Ku esaki lo bira un kaso di korte’, Gijsbertha a splika.

E ta rekonosé ku tin chèns ku den korte esaki por bira un bringamentu formal ku por bira mahoso. ‘Mi ta lamentá e ruta ku nos ta kanando awor. Pasobra esaki no ta bon pa Tromp, ni pa Banko, ni pa nos sektor finansiero. Pero nos no tin otro opshon.’

Bron: Extra