WILLEMSTAD,- Lider di partido MAN Hensley Koeiman ta splika ku su partido no ke para proseso di estudio di bachelor pa polis. ‘Nos ke haña tur informashon promé ku nos tuma desishon tokante esaki.’
Koeiman ta splika: ‘Nos tin pregunta i nos ta urgi minister pa duna nos informashon. Pero nos no por a bai di akuerdo ku moshon di oposishon djamars durante reunion di parlamento pa stòp e proseso.’
Djamars pasá MFK a entrega e siguiente moshon, ku a keda sostené dor di frakshon di partido MFK, Kòrsou di Nos Tur, Movementu Progresivo, Un Kòrsou Hustu i parlamentario independiente Eduard Braam:
‘Frakshon di MFK a pidi pa Gobièrnu para e proseso di implementashon tuma dia 26 di òktober último i outorisá pa Kontrolaria General (ARC) hasi un investigashon profundo riba e “Rechtmatigheid i Doelmatigheid” di e proyekto aki aprobá 26 di òktober 2016 den Konseho di Minister RvM # 2016/043039 basá riba e “Landsbesluit” di 30 di desèmber 2014 ku ta mará na e Rijkswet publiká den Staatscourant dia 21 yüli 2010 # 11398 i tambe den Curacaose Courant dia 27 di ougùstùs 2010, # 3’.
Tur 11 parlamentario di frakshonnan di MAN, PAR, PNP I Pueblo Soberano a vota kontra e moshon, ku a keda rechasá. Despues di reunion frakshon di MAN a urgi sr. Minister di Hustisia Nelson Navarro pa manda e dossier di estudio di ‘Bacelor Policing’ kompletu pa Kontrolaria General di Kòrsou pa un evaluashon riba “doelmatigheid i rechtmatigheid” di e proseso ku a keda hiba. Esaki tin semehansa di e moshon di MFK, pero segun Koeiman motibu prinsipal pa frakshon di MAN no a sostené e moshon pa no stòp e proseso sin mas, Koeiman a splika.
Bron: Extra