Extra | Deklarashonnan bastante emoshonal durante rueda di prensa di UTS

Paul de Geus (UTS): ‘Nos Pais Televishon’ tin hopi kuenta habrí. “Konsiderando tur kos ku a pasa, mi por bisa ku sra. Albertina sigur ta “un palu di muhé”. | Foto Extra

WILLEMSTAD,- Durante rueda di prensa di UTS dos trahadó di media di komunikashon a reakshoná bastante fuerte riba palabranan di direktor di UTS Paul de Geus.

Durante un rueda di prensa, ku a dura kasi dos ora, De Geus a divulgá diferente aspekto di situashon finansiero di e planta di Televishon Nos Pais, spesífiko tokante direktor Mavis Albertina. Esaki a kousa un reakshon bastante fuerte di e kamarógrafo di Nos Pais. De Geus su mes no a reakshoná riba e akusashon fuerte.  De Geus tampoko a reakshoná riba un deklarashon bastante emoshonal di un periodista di un media di komunikashon di radio i televishon ku a bisa ku e ta resa tur anochi pa De Geus, ku na su opinion ta un abusador grandi.

Promé ku esaki a tuma lugá De Geus a laga tur hende presente den rueda di prensa skucha un gran parti di un programa radial kontra su persona. Den e programa a bisa entre otro ku ‘De Geus tin un kurason pretu’ i ‘pa yu’i Kòrsou na Ulanda De Geus ta un persona non grata’. Tur esaki tin di aber ku transmishon di Festival di Tumba dor di UTS.

De Geus a splika ku e no ta komprendé ku asina tantu hende ta kritiká UTS, ku a bira algu hopi fèrfelu pa tur trahadónan di UTS. Durante e rueda di prensa De Geus a splika e motibunan dikon UTS a stòp ku transmishon di festival di Tumba. El a lamentá ku hopi hende den komunidat ta papia tokante e tópiko ku no tin  konosementu di e kos. E ta spera ku trankilidat lo bin bek i lo no tin hopi kritiká riba UTS mas. For di 2018 un otro organisashon lo transmití Festival di Tumba, De Geus a splika. Segun e direktor di UTS organisashon AMAK, ku ta organisá festival di Tumba, ta kla pa negoshá ku otro kompanianan.

Bron: Extra

“Nos Pais Televishon” tin hopi kuenta habrí

WILLEMSTAD.- “No ta nos kustumber pa papia tokante nos relashon ku nos kliente. I mi ta sinti hopi inkómodo pa hasi esaki. Pero mi ta sinti mi mes obligá pa reakshoná riba akusashonnan ku Mavis Albertina, direktor di Nos Pais, a hasi siman pasá den nos direkshon.” Asina Paul de Geus, direktor di UTS a splika ayera durante rueda di prensa. De Geus a splika den detaye e relashon ku UTS tin ku  Mavis Albertina i su kompania “Nos Pais Televishon”. De Geus a bisa:

“Albertina a splika den su rueda di prensa ku su kanal tabata diferente bia for di airu, i e motibu ta UTS. Mi tin ku bisa ku bèrdat un par di tempu e kanal a kai afó. UTS a kita diferente bia e konekshon di televishon i esaki ta motibu di no pago. Na momentu ku un kliente di nos no paga, nos ta obligá pa kita e servisio i esaki ta e motibu.” De Geus tambe a splika ku UTS no a ahustá fakturanan inkorekto, manera Albertina a splika. “Nos Pais no a informá nos korekto tokante e aparato ku nan ta usa. P’esei nos a ahustá.” De Geus a splika tambe ku tabatin problema ku Nos Pais i transmishon di Festival di Tumba. “Nos tabatin un palabrashon ku promé ku transmishon mester paga. Esaki tabata un kondishon. Nos Pais Televishon a duna nos un cheque, pero a resultá ku e cheque no tabatin fondo. Nos a bai bèk i nos a bisa ku esaki no por. Na e momentu Albertina a bin ku e proposishon pa usa sèn di su spònsernan, pa ora nan ta kubri Nos Pais lo distansiá su mes for di e sèn. Nos a firma un kontrakt pa hasi esaki posibel. Pero a resultá ku un di e spònser a paga promé. I Nos Pais Television a tuma e sèn kaba. E momentu ei mi tabatin e sentimentu ku “bo ta wòrdu tumá hasi”.” De Geus a splika ku esaki no ta korekto.

Te ainda Nos Pais tin un kuenta habrí na UTS tokante Festival di Tumba 2016 di 3000 florin habrí. “Mi ta haña e kos aki hopi fèrfelu.”

Bron: Extra

Nos Pais Television tin un saldo habrí na UTS di 110.000 florin

WILLEMSTAD.- Direktor di UTS Paul de Geus ayera durante rueda di prensa a splika ku resientemente el a subi Facebook pa wak e página di “Nos Pais Television”. ‘Un kos ku mi a gusta ta ku hopi hende den nan komentario a bisa ku Mavis Albertina ta un “palu di muhé”. Hopi hende a yam’é asina. Ku por sierto mi ta kere esei. Dikon? Pasobra no tin hopi hende a hasi e kos aki den un komunidat. Na promé lugá, bai laga TeleCuraçao ku un debe, den añanan nobenta, ku un debe di un par di shen mil florin. Pero e parti bieu nos a sera. Mi no tabata direktor na e momentu ei, mi no ta responsabel p’e.

E kos ku mi ta responsabel p’e ta e siguiente: E promé resibu pa servisio ku nos a manda na Nos Pais Television tabata na sèptèmber 2014. E promé pago ku nos a risibí, riba e servisio, tabata na aprel 2015. Na e momentu ei tabata un saldo habrí di 16.800 florin. Nos Pais Television a paga solamente 1900 florin. Despues sra. Albertina a firma no ménos ku tres areglo di pago ku nos. I niun di nan el a kumpli kuné. Sra. Albertina a bai korte ku nos, sali bisa ku el a gana. Mi ta kere ku interpretashon di un veredikto por ta diferente banda. Pero loke e veredikto a bisa ta kos masha simpel: “Paga e retraso ku bo tin riba bo último areglo di pago. I paga e servisio adelantá.  Si bo a hasi esaki UTS ta obligá pa habri e servisio.”

De Geus: “Sra. Albertina a kumpli ku su pago, el a paga nos 9000 florin, di kosnan atrasá, i nos ta warda pa e paga di e otro kuentanan habrí.” De Geus: “Nos komo UTS a wòrdu kritiká hopi komo abusador di poder. Pero na diferente okashon nos a saka man na kurason, yuda i te ku awe nos por bisa ku Nos Pais Television ta den aire. Pero na momentu aki Nos Pais Television tin un saldo habrí ku nos di 110.000 florin. I pa kolmo ora nos ta buska pago, nos no por haña. Nos mester pone beslag riba pertenensianan di sra. Albertina. Ora nos a bai hasi esaki, ta resultá ku tin sinku beslag kaba. Esaki ta nifiká ku nos lo no haña sèn. Konsiderando tur kos ku a pasa, mi por bisa ku sra. Albertina sigur ta “un palu di muhé”.”

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *