WILLEMSTAD,- ‘Mester bin solushon hopi lihé pa problemanan ku wardadónan di prezu tin pa hopi tempu kaba.’ Asina Minister-Presidente i Minister di Hustisia Gilmar ‘Pik’ Pisas ta splika.
‘Nan tin hopi problema ku diferente aspekto di seguridat. Un di nan ta nesesidat pa ‘bullet proof vest’ i esun ku ta mas importante ta glas kontra bala na porta di entrada di e Instituto pa Korekshon Kòrsou.’ Pisas a splika ku el a papia ku direktor di prizòn, ku ta sr. Urny Floran, tokante e tópiko di e glas kontra bala. Pisas: ‘Mi a pidi pa nan aselerá e proseso pa e glas bin via avion. I no via barku, pasobra e ta tarda e proseso mas tantu’, segun Pisas.
‘E situashon ta hopi peligroso, mi ta kere komo Gobièrnu nos mester wak kon nos por sòru ku mas lihé posibel e glas lo yega Kòrsou i lo keda instalá riba un término mas kòrtiku posibel.’ Pisas a splika ku situashon di trahadónan den prizòn semper ta unu tenso. Resientemente trahadónan a reuní bou di orario di trabou. Segun Pisas awor mayoria di e trahadónan ta trahando atrobe. ‘Pero problema ku seguridat mester keda resolvé mas lihé posibel, na un manera duradero.’
Ku esaki Pisas ke mustra ku gobièrnu aktual ta tuma e situashon na prizòn na serio. ‘Trahando den kuerpo polisial mi tabata na altura di nan problema kaba. Komo parlamentario semper mi a informá mi mes tokante situashon den prisòn. Komo Minister di Hustisia mi a kuminsá hopi lihé pa yuda solushoná e problemanan. Nos ke kanalisá problemanan di seguridat pa trahadónan i tambe e hendenan ku ta enkarselá. Mayoria di e problemanan ku ta eksistí ta den proseso kaba. Mi ta spera ku despues di elekshon mi por bin bek komo Minister di Hustisia pa realmente resolvé e problemanan na prizòn.’
Bron: Extra
Representantenan di wardadónan di prezu i Gobièrnu a yega na un akuerdo
WILLEMSTAD.- Representantenan di e wardadónan di prezu a yega na un akuerdo aparentemente ku Gobièrnu pero ainda esaki no a keda finalisá, segun abogado Lichtenberg. Hues de Kort dia 6 di aprel último, den un huisio sumario a manda representantenan di Gabinete Pisas, Rigo Thode i e presidente di e grupo di e wardadónan di prezu Albert Martina i representante di ABVO Kenneth Bremar, bai mesa pa wak si por yega na un akuerdo pa resolvé e pago di e reorganisashon final i posishon hurídiko ku e trahadónan di prizòn pa años ta wardando riba dje. Esaki despues ku Gobièrnu a entamá un kaso kontra di e wardadónan di prezu despues ku nan tabatin dos dia den wèlga.
Hues a duna nan e fecha di dia 13 di aprel último, pa bin korte bek i bisa hues ki areglo nan a yega na dje. Mirando ku ainda e negoshashon ta andando, hues a pospon’é e fecha ku un siman mas, pa asina duna e partidonan chèns pa terminá e lastu fasenan.
E presidente Albert Martina a duna di konosé ku nan tin 10 aña ta warda pa nan posishon hurídiko i funshonnan ku a wòrdu akordá for di aña pasa for di e buki di funshon ku ta kla kaba, pa wòrdu firma. Nan a manda un karta pa Minister Presidente Pisas, kaminda nan ta splik’e ku nan falta e parti di konseho hurídiko i e plachi finansiero pa keda firma. Pisas a kontestá ku esaki lo bai dura mas o ménos 4 siman pa pasa den e prosedura pa asina yega na un solushon. Esaki a pone ku e wardadónan di prezu a rabia i rechasá e karta pa motibu ku nan ta bisa ku aki 4 siman mas o ménos ta elekshon i ku ta bai sinta un Gobièrnu nobo i no sa kuantu mas nan tin ku bolbe bai warda. E trahadónan a bisa ku nan no por warda te aki dos siman mas pa haña un kontesta.
Abogado Lichtenberg a boga pa laga e petishonnan kana los, si no por hasi esaki den trayektoria. Ta trata aki di mas o ménos 30 mion florin ku tin ku wòrdu saka pa paga e wardadónan di prezu ku retro aktivo.
Bron: Extra
Gilmar ‘Pik’ Pisas, splika nos awor foi unda bo ta bai saka e sen pa drecha e siguridat? Paso poko tempu pasa bo di no tin sen i ku nos ta bankrut.
Anto ta awor ku e wardadornan di presu a reklama boso ta tuma akshon?
Kaba ta bai drumi bek?