WILLEMSTAD.- Ayera den kaso Superior Babel, ku ta e kaso kaminda a akusá Gerrit Schotte i Cicely van der Dijs di a kometé vários echonan kastigabel, e pareha a disidí di kibra e silensio ku nan a bin ta tene durante korte di promé instansia.

Schotte ku a keda kondená na un kastigu di 3 aña di prizòn i Cicely na 18 luna di kual 9 kondishonal, a duna di konosé ayera ku awor si nan ta kla pa papia i konta e historia ku tin tras di tur e asuntu aki.

Schotte a kuminsá bisa ku e ta lamentá e eskoho robes ku el a a hasi aña pasa, di hasi uzo di su derechi keda ketu.

Segun Schotte, nan ta kompletamente inosente i ke aklará algun punto ku e ta keda akusá di dje, ku no ta kuadra ku bèrdat.

E Presidente di Hof mr Radder a kuminsá pasa riba e akusashonnan un pa un ku e pareha i asina tende loke nan tin di bisa riba esakinan.

Pa loke ta trata e fakturanan falsifiká ku Polisnan a haña den e kòmpiuter di Schotte i tambe den un investigashon na Italia den kantor di Corallo, e akusado a bisa ku nunka di su bida e no a uza e fakturanan aki.

El a atmití ku bèrdat e tabatin nan, pero nunka no a uza, ni print, ni traha esakinan paso e no tabata di akuerdo ku Corallo riba esakinan.
Segun Schotte, Corallo tabata esun ku a manda e fakturanan aki pe, ora ku e tabata manda donashon pe.

El a bisa di a rabia ku Corallo i a bis’e ku e no tin nesesidat di faktura i a fasilit’é algun resibu.

Riba esaki e presidente di korte a duna di konosé ku kon por ta posibel komo Minister Presidente e tempu ei, bo ta akseptá 4 biaha ku Corallo ta manda faktura falsifiká di negoshi di bo señora ku sifranan di sèn riba dje i bo no a par’e.
Riba esaki Schotte a duna di konosé ku el a para Corallo, pero esaki a keda manda e fakturanan tòg.

Segun Schotte pa motibu di e insidente aki nan tabatin guera ku otro, di kual el a stòp di papia ku Corallo basta dia.

E tribunal a puntra Cicely kiko e ta pensa di esaki mirando ku e fakturanan tabata riba negoshi di su tata i si e tabata sa di nan, e dama a kontesta ku el a spanta ora el a mira e faktura nan.

Segun Cicely ta e dia ku e tim di RST a tene un entrada hudisial, nan a mustr’e e fakturanan i a haña sa di nan.

E dama a bisa di a keda di shòk pa motibu ku e no sa di unda e fakturanan a sali anto ku logo bieu di Vanddis.

Segun e dama, nunka Schotte no a bis’e di esaki pa motibu ku su partner no kier a lag’e preokupá pòrnada, mirando ku e fakturanan lo no a wòrdu uza. El a bisa di a ripara ku Schotte no tabata papia basta dia ku Corallo pero e no a puntra dikon.
Segun Cicely, e konosé Corallo via di Schotte na aña 2009, pero nunka a keda den kontakto kuné.

Riba e pregunta di hues na e dama kon bin e logo di su tata su negoshi a yega den man di Corallo, el a bisa ku e no tin niun idea i kisas ta via internèt.

Bron: Extra