WILLEMSTAD.- Ministerio Públiko (OM) ayera a pidi e eks-polítiko Norbert George pa e rektifiká deklarashon engañoso ku el a lansa riba e servisio hudisial aki di tin periodista kumpra.

OM a indiká di a tuma nota ku ayera den un kombersashon i diskushon riba e ret sosial Facebook, un siudadano den wikènt tras di lomba, a deklará ku Ministerio Públiko tin 3 periodista riba “payroll” pa publiká kosnan positivo di OM. Riba e ret sosial, George a bisa ku e tres personanan aki ta drenta i sali ku ènvelòp.

Ministerio Públiko enfátikamente ta ninga e deklarashon aki, i ta eksihí un rektifikashon di e persona en kuestion, den e kaso aki di sr. Norbert George, ku a vosiferá e akusashon infundá i inapropiá aki.

Ministerio Públiko ta deklará ku OM ta un organisashon serio na unda no tin lugá pa tipo di práktikanan aki.

E akusashon ku srs. Yves Cooper, Richeron Balentien i un periodista, no a menshoná su nòmber, di Radio Hoyer ta riba “payroll” di OM, no ta bèrdat, i ta nada mas ku puro ko’i kèns.

P’esei OM ta eksihí un rektifikashon públiko pa evitá ku e informashon robes aki ta bai biba su bida. Nos ta lamentá e publikashon infundá aki.

Bron: Extra