WILLEMSTAD.- Segun informashonnan for di fuentenan familiar di Jorge Jamaloodin, su abogado awe lo mester a òf lo bai manda un karta pa Ministerio Públiko, dunando 2 biaha 24 ora pa hala aden e petishon di detenshon ku tin kontra di dje.
Manera ta konosí, Ministerio públiko djasabra a informá ku a detené Jorge Jamaloodin na Venezuela. EXTRA a averiguá un ke otro i nos no sa kiko Ministerio Públiko ta yama detené, pero den prisòn sigur e no ta. Loke si EXTRA a komprondé di su famia ta ku pa medio di su abogado e tin un karta 6 siman pasá kaminda Ministerio Públiko lo a inform’é ku no tin mester di dje. E karta a bin riba un pregunta di e abogado si mester di Jamaloodin i a haña un NO komo kontesta di Ministerio Públiko.
Segun su famia, nunka Jorge Jamaloodin no a nenga di bin Kòrsou, ya ku ta legalmente el a sali for di Kòrsou pa bai Venezuela.
Semper Ministerio Públiko tabata sa unda e ta i si nan no sa, pa medio di su abogado semper por a haña kontakto kuné.
E famianan ta konsiderá e paso di Ministerio Públiko aki komo ‘dwaling’ den e kaso si supuesto investigashon kontra di Jorge Jamaloodin. Nan ta haña ku Ministerio Públiko no ta papiando e bèrdat.
I p’esei e karta ku ta duna OM 2 biaha 24 ora pa hala e petishon aden i si no lo bai un huisio sumario kontra di Ministerio Públiko.
E famia ta konsiderá loke ku Ministerio Públiko ta hasiendo ta un shou total.
Bron: Extra