Extra | Omayra Leeflang ku denunsia na Ombudsman kontra abogadonan di apòstel Balentina

Omayra Leeflang ku denunsia na Ombudsman kontra abogadonan di apòstel Balentina

WILLEMSTAD.- Siman tras di lomba e kaso penal kontra “Apòstel” Orlando Balentina a tuma lugá den korte di promé instansia. Ta trata di e kaso kaminda 10 damita a hasi denunsia di aktonan inmoral i violashon ku e akusado a hasi ku nan.

Pa ku esaki Ministerio Públiko a hasi un demanda di 18 aña di prizòn pa ku e akusado Balentina. Abogadonan ku a hiba e defensa tabatin nòmbernan di e víktimanan den e loke nan ta yama “pleitnota” di kual esaki di un òf otro manera a bin den publisidat.

Riba esaki tantu e abogado i famianan di e víktimanan ta hopi rabia, mirando ku a tacha nan privasidat. Lider polítiko di un Kòrsou hustu sra. Omayra Leeflang ku a tuma nota di e akto aki, a manda un karta pa defensor di pueblo “Ombudsman” kaminda e ta hasi denunsia di e nòmbernan di e víktimanan ku a sali den media dor di e abogadonan di e akusado. Segun e karta di sra. Leeflang, publikando nòmber di e víktimanan ta un abuzo. El a bisa ta un akto profundo di inmoralidat di violashon di privasidat i falta di nivel/ étika profeshonal.

Segun sra. Leeflang, ta parse manera ku kier kastigá e víktimanan pa e echo ku nan a denunsiá e aktonan di inmoralidat, dor di publiká nan nòmbernan. Sra. Leeflang a sigui bisa mas aleu den e karta ku e akto baho aki di pa kolmo personanan femenino, ta ilustrá kon difísil ta pa atendé ku abuso seksual. El a bisa ku tur abuso seksual ta sosodé skondí, pues ta masha difísil pa proba un akto asin’aki.

Segun Leeflang, e agresor sa esei hopi bon i p’esei mes e ta sigui su aktonan, pa motibu ku e sa ku e víktima ta kasi sin defensa. Pues e víktima tambe ta realisá ku e no tin prueba i komo tal ta keda ketu i tin biaha hasta kulpa su mes. E lider polítiko ta di opinion ku publikashon di e nòmbernan dor di abogadonan defensor di e akusado Balentina, a konfirmá e miedu i spanta tur víktima di abuso seksual. Na sra. Leeflang su pareser, ku e akto aki a bolbe “violá” e víktimanan.

Segun sra. Leeflang, e profeshonalismo di Ministerio públiko i spesífikamente fiskal Vicento, pa no publiká su rekisitorio ku e nòmbernan di e víktimanan, ta altamente di apresiá i ta demostrá un nivel haltu di profeshonalismo. Sra. Leeflang por último a bisa ku e ta boga pa Orden di Abogado adoptá un norma den e kódigo di profeshonalismo, ku ta prohibí abogadonan di kometé e akto di krueldat aki dor di publiká nòmbernan di e víktimanan di abuso seksual i evitá ku den futuro e barbaridat aki por ripití.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *