WILLEMSTAD.- Ayera Ombudsman a manda un karta pa minister di finansa, relashoná ku e echo ku na duana no por paga ku sèn kèsh mas pero solamente ku swipe. Segun Ombudsman for di 1 di yüni último duana ta aseptá solamente karchi banko, prueba di depósitonan na banko, pago online.

Meta di e kambionan ei segun Ombudsman por  a komprondé ta pa hasi e proseduranan di duana mas sigur i efisiente. E meta ta algu komprendibel pero e pregunta ta si e desishon di minister di finansa por keda konsiderá komo maneho korekto di e dunamentu di servisio na komunidat kompleto.

Pa Ombudsman no a sali na kla si e ministerio tin otro lugánan kaminda e siudadano si por hasi su pago ku sèn kèsh. I den e kuadro aki e ta mustra riba e sentensia di korte di novèmber aña pasa. Ta trata di un kaso ku Fundashon pa Konsumidó a kuminsá kontra di Aqualectra ku tambe a introdusí e sistema di paga solamente ku tarheta. Den e  kaso ei Aqualectra tabatin puntonan di pago kaminda e kliente por paga ku sèn kèsh.

Den e karta aki, Ombudsman ta urgi Minister di Finansa pa rekonsiderá e desishon aki di manera ku ta tene kuenta tambe ku personanan ku pa diferente sirkunstansia por paga solamente kèsh pa servisionan di gobièrnu/Duana.

Bron: Extra