Extra | Palabranan minister di hustisia no ta sufisiente pa abogadonan

Palabranan minister di hustisia no ta sufisiente pa abogadonan

Palabranan minister di hustisia no ta sufisiente pa abogadonan

WILLEMSTAD.- Parse ku palabranan ku minister di hustisia Nelson Navarro a duna abogadonan no ta sufisiente. Por lo tantu nan ta drenta awe 5 dia di akshon. E akshon ta keda te fin di desèmber.

E abogadonan ta den akshon pa oumento di kompensashon di 900 florin te na 2500 florin pa kasonan prodeo tantu na nivel sivil komo penal.

Abogado Russel Martis den deklarashon pa EXTRA a ku ketu bai nan ta den akshon. Dia promé di desèmber último minister di hustisia a manda karta pa direktiva di Orden di Abogado, bisando ku e kos a tarda asina tantu i loke ku abogadonan ta risibí ta hustifiká. E minister  a trata di hustifiká e tardansa argumentando ku esaki ta debí na kombersashonnan interno pa un presupuesto. I banda di esei e minister ta bisa ku e  trayektoria pa yega na e ‘aanpak’ a tuma mas tantu tempu. Pasobra no solamente mester tene kuenta ku e aspekto finansiero, pero otro aspektonan importante tambe.

Segun sr. Martis, esaki nan ta palabranan bunita ku nan a yega di tende kaba, i esei no ta duna nan niun sorto di garantia ku lo bini e kambio di pago pa kasonan prodeo tantu penal komo sivil. P’esei nada no ta kambia na akshon. E akshon e biaha aki ta un tiki mas amplio i ta dura te ku fin di desèmber.

Mas aleu e abogado a bisa ku e akshon no ta kubri solamente e parti piket (penal), pero e parti sivil. E parti sivil ta poko delikado dor ku tin kasonan andando. E kasonan sivil tin interesnan finansiero ku ta bini aserka.

Básikamente ku e akshon aki, abogadonan no ta tuma niun kaso mas prodeo pa loke ta trata kasonan sivil i penal. Kasonan andando mester wak kada un riba nan mes, i ta kada abogado ta wak si ta responsabel pa wanta kuné. Mester wak sierto interes pa no perhudiká e persona envolví demasiado. Ta na kada abogado pa evaluá kada kaso pendiente ku nan tin. No por bisa tur abogado pa laga tur kos bai for di bo man i warda minister tuma desishon, Martis a deklará.

Esaki ta e di dos akshon ku abogadonan ta tene. Den luna di yüni a akshoná. E tempu ei, e intenshon ta pa oumentá e kompensashon den dos parti i promé stap ta yanüari 2017  di florin 900 pa 1800 florin. E di dos parti lo ta na 2018, 2500 florin. Banda di esei e asistensia duna durante interogashon no ta wòrdu paga, i detenidonan tin derecho riba asistensia di abogadonan durante interogashon. Nan a pidi p’e servisio aki un suma di 450 florin. Minister Navarro a bai di akuerdo ku e oumento aki, segun Martis.

E akshon ta indefiní i fin di desèmber e abogadonan ta reuní, evaluá e akshon i si wak si mester sigui. Finalmente mr. Martis a bisa ku ta responsabilidat di minister pa un detenido tin asistensia di un abogado.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *