Meimei di e ambiente di entrega di lista pa elekshon nos a kombersá ku sr. Godett i el a deklará entre otro ku for di su último intento pa bai elekshon el a bisa ku e lo no bai mas komo lider polítiko di FOL sino ku e lo laga e posishon habrí pa otronan. Pues e lo a bai kumpli ku su palabra.

Pero ta manera un yamada djariba a bini ora ku Amado “Broertje” Rojer a yam’é ku e proposishon pa drenta un aliansa ku PAN. El a pensa ku e ta yu di Wilson “Papa” Godett i Amado ta yu di Hubert “Bèbè” Rojer, i ta dos persona luchadó inkansabel pa e klase trahadó. Pues e no ta mira motibu dikon e siguiente generashon lo no por uni pa sigui e lucha kontra inhustisia.

Pues no tabata masha difísil pa uni forsa. I e ta konvensí ku e biaha aki lo bai muchu mas mihó ku e último elekshon tantu pa e aliansa PAN/FOL. Tin un kantidat di hende riba lista i hende trahadó. E mensahe kla ku a duna ta ku no tin mester di ‘sierpaarden’ sino ‘werkpaarden’, pues no tin mester di hendenan pa fungi komo adorno, sino hendenan ku ta traha pa e partido.

Tin kandidatonan di ámbos partido riba e lista ya ku ta un lista kombiná, i lo bai mira pa otro siman mes ora ku kuminsá ku e preelekshon, lo no tin kuestion ku PAN ni FOL a keda afó. E ta sigur ku e aliansa aki lo ta presente den e kontienda pa e próksimo elekshon, i aki lo bai mira ku e forsa lo krese aun mas, pasobra e pueblo ta fadá i kansa despues di tantu promesa i engaño. Ora ku partidonan ta haña e konfiansa pa goberná nan a opta pa hasi bochincha den Parlamento. Pero pueblo no meresé e tipo di kosnan aki. I esei ta e garantia ku e i tambe Rojer lo duna pueblo, esta ku e bochinchanan aki lo no sosodé bou di mandato di PAN/FOL.

Segun Godett, ku su eksperensia den polítika e lo por yuda hopi, i den e mesun rosea e por isa ku Rojer ta un persona ku ta yuda hopi den barionan di Kòrsou. Pero ta kosnan ku e ta hasi sin muchu fanfare. Ta momentu pa e proba loke e ta hasiendo den barionan, i e lo yuda ku su eksperensia. E aliansa aki ta bisa bon kla ku “ta basta”, pasobra no tin espasio pa bochincha.

Bron: Extra