WILLEMSTAD,- ‘Despues di 16 aña komo parlamentario, pa Kòrsou i Antia, mi por bisa ku mi a mira hopi kos pasa. Kosnan tristu, kosnan bon, kosnan di speransa i tristesa. I’ve seen it all.’

Asina Glenn Sulvaran a bisa ayera durante e último reunion di Parlamento di Kòrsou 2012- 2016. Awe lo huramentá e parlamentarionan ku lo drenta den parlamento nobo.

Sulvaran a menshoná Martin Luther King ku a splika ku durante un persona su bida ta importante si un hende a hasi un diferensia den bida di otro hendenan. Segun Sulvaran esaki spesífikamente ta importante pa parlamentarionan, ‘Esei ta e tarea di nos. Hasi diferensia den bida di otro hende. Purba hasi diferensia den bida di otro hende.’

Sulvaran a gradisí griffier i su tim i a gradisí tur parlamentarionan ku a keda elegí. ‘Pasobra ta un honor pa bo ta un parlamentario. Esaki ta importante. I mi tin e idea ku e honor ei nos pueblo no ta karg’é na su banda i nos mes hopi biaha no ta karg’é tampoko. No lubidá ku tiki hende ta haña chèns pa representá nan pais. Nos tin ku karga e funshon ku honor i rèspèt mas tantu ku nos por. I esei mi ta sintié ta bai.’ Segun Sulvaran na Aruba, Bonaire i St. Maarten i paisnan afó tin mas rèspèt pa e trabou di ta ser un parlamentario ku na Kòrsou. ‘Nos ta pèrdiendo esaki.’

Sulvaran a bisa ku e ta retirá for di polítiko, pero su konosementu ta keda disponibel.

Bron: Extra