WILLEMSTAD.- Segun presidente di komishon di Komishon di Asuntunan di Reino, Relashonnan Interparlamentario i Relashonnan Eksterior, i tambe hefe di delegashon di Parlamento di Kòrsou Giselle Mc William, preparashon pa konferensia Interparlamentario di Reino Ulandes (IPKO) a bai bon.
Manera ta konosí IPKO ta keda organisá entre 10 i 12 di yanüari. Durante e IPKO delegashonnan di parlamento di Kòrsou, Aruba, St. Maarten i Ulanda lo deliberá.
Mc William: ‘Nos a kuminsá ku preparashon dos luna pasá. Kòrsou i St. Maarten tin un parlamento bastante nobo. Dos luna pasá a lansa e idea pa posponé IPKO te na yüni e aña aki. Pero nos a disidí pa no para IPKO. A mira nesesidat pa bin huntu.”
E IPKO na Kòrsou lo tin un karakter mas informal ku normal. Foko lo ta ku sera konosí di tur miembronan di Parlamentonan nobo i tambe interkambio di konosementu entre e diferente parlamentarionan. Konsekuensia di esaki lo ta ku e IPKO aki lo no konosé un lista di akuerdo na final di e konferensia. ‘Lo no tin ‘afsprakenlijst’. Tur kos ta bira un tiki mas informal. Pero nos ta di opinion ku ta importante ku partnernan den reino ta keda den kombersashon ku otro i keda deliberá riba tópiko di importansia.”
Mc William: ‘Nos tin e Areglo di disputa, e Geschillenregeling riba agènda ku e diferente komplemento ku tur partidonan tin.” Otro tópiko riba agènda ta desaroyo di haf di Kòrsou, esaki relashoná ku e partisipashon di e kompania ulandes Damen den Dòk. Tambe tin atenshon pa Oostpunt, ku lo ta bai un trabou di bishita na Oospunt ku parlamentarionan di Reino. Tambe lo tin un bishita di trabou na hospital nobo i tambe tin atenshon pa tópikonan manera hubentut, enseñansa i salubridat.
Bron: Extra