WILLEMSTAD.- Mañan ta kuminsá Konferensia di Interparlamentario di Reino Ulandes (IPKO). Durante e konferensia lo tin atenshon, entre otro, pa un tópiko remarkabel, ku ta futuro di reino ulandes.
Lider di delegashon di Kòrsou Giselle Mc William ta splika ku durante e konferensia lo ta bai forma diferente ekipo “kaminda kada un di nos lo bai trese dilanti kon nos ta bai mira e konstelashon di reino den aña 2040”. Mc William: ‘Esaki ta algu hopi interesante.” Segun Mc William tur parlamentario lo splika kon nan ta mira konstelashon den reino den aña 2040. IPKO ta kuminsá djamars 10 di yanüari. Awe lo kuminsá un deliberashon tripartit entre delegashonnan di parlamentonan di Kòrsou. Aruba i Sint Maarten.
Tópikonan durante e deliberashonnan lo ta areglo di disputa (Geschillenregeling) i tambe e tópiko di ‘Initiatiefrecht’ ku ta un punto ku a bin dilanti for di Aruba. Esaki tin di aber ku e oportunidat ku parlamento di Kòrsou, Aruba i Sint Maarten por haña e derechi pa bin ku inisiativa pa leinan di reino.
E akto ofishal di e konferensia Interparlamentario di Reino Ulandes (IPKO) ta kuminsá 10 di yanüari 9:45 di mainta den e sala di konferensia Atrium di hotèl Renaissance ku palabra di bon biní di Presidente di Parlamento di Kòrsou, siguí dor di spichnan di hefe di e delegashon di Parlamento di Aruba, Sint Maarten i Ulanda. Promé ku delegashon ulandes lo ta na Kòrsou nan lo bishitá Boneiru. Awe na Boneiru nan lo ta presente den un ‘summit’ organisá pa Entidat Públiko Boneiru, ku komo tema “pobresa”.
Bron: Extra
