WILLEMSTAD.- Eks-lider di partido Nashonal a bisa ku e partido bèrdè por nombrá ken ku e partido kier komo lider di e partido.
“Ami no ta un opstákulo mas despues ku mi a entregá mi retiro na aprel último”, asina Davelaar a bisa ayera relashoná ku publikashonnan, entre otro den EXTRA, ku ta trahando riba un liderato nobo pa reskatá e partido.
Den e elekshonnan di e aña aki e partido no a haña asiento pa promé bes den su historia polítiko. Awor aki tin trámitenan ta tumando lugá pa pone e partido bèk riba pia. Den e kuadro aki baluartenan di e partido a bin huntu. Diferente hende ku a bandoná e partido òf no tabata dje aktivo ei mas ta parti di e proseso. Bankero Chris Peterson ku tabata riba lista di e partido den pasado tin den konsiderashon di e petishon di e partido pa asumí liderato di e partido. Tabatin informashon e aña aki na momentu ku e partido a parti den dos i e dirigente polítiko Suzy Camelia-Römer a lanta su mes partido (PIN) ku Peterson lo a bai ku e grupo aki. Sinembargo na último momentu su nòmber no a aparesé den e grupo. Di tur manera e partido ta buskando un lider nobo i Peterson ta un di e kandidatonan ku ta konsiderando pa lider di e partido. E ta e petishon “den konsiderashon”.
Davelaar a laga di komprondé bon kla ku e no ta un estorbo pa nada. “Mi tin algun luna sin tin kontakto ku partido. Mi ta miembro ainda di e partido i na momentu ku disidí riba un lider nobo opviamente mi por ta presente i vota tambe pa kualke kandidato ku direktiva presentá. Te einan mi posishon aktual ta yega”, asina e eks-dirigente a bisa.
E lider polítiko no kier a drenta den e análisis ku tin pa basta tempu ku si el a hala un banda i bai riba puesto number dos despues di Camelia-Römer ku awor aki e partido lo tabatin tres asiento. “Mi punto di bista ta konosí di kon mi no a hala pa e elekshon di aprel último. Partido a bai dilanti den e elekshon di òktober i no tabatin motibu pa mi hala na aprel”, asina el a bisa.
Davelaar a bisa ku e lo sigui komentá mas tantu posibel riba desaroyonan ku Kòrsou ta pasando aden. Den e kuadro aki el a bisa ayera ku mester bin un otro pensamentu pa Kòrsou bai dilanti, konsiderando ku tur otro pais ta bayendo dilanti pero ta Kòrsou so ta kedando atras. Kòrsou ta para dilanti retonan importante na 2019 i 2020, entre otro pa loke ta trata e status di LGO ku nos isla tin awor aki. Resientemente Davelaar a pidi pa ban diskutí konsepto di PUG ku diferente pais ku tin asosashon awor aki ku Oropa.
Bron: Extra