WILLEMSTAD.- Partidonan polítiko tantu di den gobièrnu komo pafó ta preparando pa elekshon dia 28 aprel próksimo. Sinembargo tur ta pendiente pa desishon final si elekshon ta tuma lugá si òf no.
EXTRA a papia ku algun partido polítiko kaba manera FOL, PAS i UPN ku a indiká ku nan lo partisipá den elekshon di aprel próksimo.
Ayera e lider di partido GOOL, sr. Kenneth Dambruck a bisa EXTRA ku ainda un desishon definitivo no a kai pa partisipashon di GOOL den próksimo elekshon. Pasobra e no a spera ku lo tabatin elekshon asina lihé atrobe. GOOL a haña 205 firma di sosten den elekshon di òktober 2016.
Di parti Partido Demokrat (DP), e presidente sr. Frank Gressman a deklará ku e Tolda Kòrá for di siman pasá a reuní, i ta traha duru pa hasi e trámitenan pa hinka nan lista. Pues DP tambe ta bai elekshon. Mas detaye ken lo ta enkabesá e lista sr. Gressman no por a bisa, pasobra ta trahando riba esaki.
“DP ta un partido serio ku su fundeshi i rais profundo ankrá den komunidat di Kòrsou. Nos a haña hopi yamada pa no keda afó”, Gressman a bisa. DP a pasa e sosten di firma opteniendo 1094 firma i den elekshon a haña 1963 firma. E lider dje partido sra. Geraldine Scheperboer-Paris a tuma su retiro for di e partido.
Sr. Amado Rojer di Partido Aliansa Nobo a bisa ku nan ta partisipá den elekshon. Ounke nan tambe tin e duda, pero ta prepará pa bai elekshon sigur. E partido no a logra bai elekshon di òktober 2016 dor ku el a optené solamente 280 firma di sosten.
Lider di 1 Tim Magno, sr. Aubert Wiels a bisa EXTRA ku ainda nan no a disidí si ta bai elekshon. E tambe ta haña ku tin hopi bruashon i mester evaluá nan partisipashon.
Manera ta konosí siman pasá lider di partido Pro Kòrsou sr. Ivar Asjes a indiká ku e no ta bai elekshon i lo dediká atenshon na su famia.
Hopi di e partidonan aki tambe ta papia di bai un lista kombiná, pero riba tur kos, nan tambe ta en espera di desishon final di e fecha di 28 aprel ta keda para.
Bron: Extra