WILLEMSTAD.- Dia 12 di febrüari 2017 a tuma e desishon pa disolvé Parlamento i tambe pa dia 28 di aprel 2017 tene elekshon nobo pa Parlamento.
E preparashon pa e elekshon ei lo mester ta e tarea prinsipal di e gabinete interino ku lo sinta awe. Gobernador a indiká e formador di e gabinete interino esaki for di inisio di e formashon. Sinembargo segun sra. Suzy Römer lider di PIN, tin señalnan fuerte ku e gabinete interino lo trata di revoká e dekreto di 12 di febrüari 2017 pa asina anulá e elekshon.
Si akaso mester yega asina leu e ora ei Partido Inovashon Nashonal (PIN) lo bai kontra esaki mesora serka hues.
Un elekshon ku legalmente konforme Konstitushon a keda konvoká, no por keda pará. Esei ta fundamental den un estado di derecho demokrátiko.
Konvoká elekshon ta nifiká ku ta puntra pueblo di Kòrsou pa disidí kon mester sigui awor.
E lider ta sigui bisa ku esei tambe ta konta pa elekshonnan antisipá. Si e desishon kon mester sigui awor a keda poné den man di pueblo, esei no por keda revoká mas. Paramentu di un elekshon ya konvoká ta nifiká seramentu di boka di pueblo di Kòrsou. Esei ta inaseptabel.
Ku un elekshon pueblo di Kòrsou ta disidí pa skohe e miembronan di Parlamento. Partido Inovashon Nashonal (PIN) durante e fin di siman di 18 i 19 di mart 2017 a risibí di un forma konvisente e sosten di pueblo di Kòrsou pa postulá pa e elekshon di 28 di aprel 2017, kandidatonan pa miembresia di Parlamento. Si anulá e elekshon ei aworakí, lo kometé un infrakshon inaseptabel riba e sosten di e pueblo di Kòrsou i e derecho di pueblo pa vota dunando asina direkshon di su futuro.
Sra. Römer ta bisa ku un gobièrnu ni tampoko un mayoria den Parlamento no tin e outoridat pa para un elekshon ya konvoká. No opstante kon fuerte nan opinion ta ku elekshonnan antisipá no ta deseabel. Nan no ta pará riba lei!
Partido Inovashon Nashonal (PIN) semper lo vigilá e prinsipionan fundamental di un estado di derecho demokrátiko. Esei ta konta pa e derecho di pueblo pa vota riba un kandidato pa e miembresia di Parlamento. Esei tambe ta konta pa e derecho pa un siudadano postulá su mes pa e miembresia di Parlamento. Partido Inovashon Nashonal (PIN) ta konvensí ku hues lo duna PIN rason.
Bron: Extra