WILLEMSTAD.- Segun Minister di Hustisia sr. Gilmar Pisas, resientemente despues ku el a kaba di duna un entrevista na televishon el a tuma nota di e reakshon di Sr. Carl Camelia. Ta un bèrdat ku ‘deal’ ku sifra no ta un di su birtutnan, segun Pisas.

Ta un bèrdat tambe ku e ta sali for di kuerpo polisial i ta sumamente orguyoso di esaki. Siendo un polis ku hopi eksperensia a permití e huntu ku su personal i kolaboradornan pa investigá e asuntu di ‘Bachelor opleiding’ i deskubrí eksaktamente kon tur kos a tuma lugá.

Segun e minister, loke el a konstatá ta ku tabatin un destaho públiko i ku Sr. Camelia a haña e enkargo pa hasi un investigashon di e problemanan ku a presentá na e Skol di Polis i presentá posibel solushonnan. Sr. Camelia a presentá resultado di un enkuesta, sin nunka a papia ku e protagonistanan mes i a risibí un suma total di Nfs. 407.154,48 pa esaki.

Remarkabel ta ku un persona ku no ta un deskonosí pa famia Camelia-Romer, ku e tempu ei tabata enkargá ku kambionan den Kuerpo Polisial, Sr. Alvin Daal (Presidente Partido PIN) ta esun ku tabata akordá e fakturanan i presentá esakinan pa paga tur luna na Sr. Camelia. Hustamente tumando na kuenta e fasilidat ku esakinan tabata sosodé, sr. Camelia aparentemente, a bin ku e briante idea pa e mes kuminsá ku e ‘Bachelor opleiding’ pa e suma di Naf.5.6 mion.

Atrobe sin ku esaki a bai un destaho públiko, ni tampoko tabata presupuestá. Plakanan ku por a keda usa hustamente pa drecha e skol di polis i kalidat di enseñansa, i di tal forma duna e pueblo pagadó di belasting i polisnan bon ekipo pa por sòru pa un mihó protekshon i servisio. No tin duda ku e desishon aki tambe lo keda investigá te den su profundidat i seguidamente entregá na Kontrolaria General pa sigui ku e investigashon.

II. Dekreto Gubernamental ku ta reglá Fondo di Kriminalidat

Den artíkulo 2 por lesa ku tin un fondo ku ta na bienestar di finansiamentu di proyektonan ku ta regardá kombatimentu di kriminalidat. E fondo aki – segun artíkulo 4 di e dekreto gubernamental ya menshoná – ta bou di supervishon/
atministrashon di Minister di Hustisia.

Bou di guia di minister e diario ta enkargá na e direktor di e Departamento di Hustisia (lesa Sekretario general di Hustisia).
Dekreto Ministerial

E atministrashon di e fondo a wòrdu integralmente organisá den un dekreto ministerial.

E promé kriterionan pa por bini na remarke pa un finansiamentu for di e fondo ta, ku mester ta trata di proyektonan pa:

1. Prevenshon di kriminalidat;
2. Kombatimentu di kriminalidat;
3. Resosialisashon I rehabilitashon;
4. Preparashon/kurso i entrenamentu.

E fondo ta konsistí di:

• un tim konsistiendo di funshonarionan ku ta elaborá na Ministerio di Hustisia, enkargá ku maneho di e fondo; e asina yama tim di ehekushon (uitvoeringsteam);
• un komishon ku ta formá pa tres (3) funshonario eksterno, enkargá ku supervishon i evaluashon di petishonnan ku ta drenta pa ku finansiamentu di un òf mas proyekto.
• E tarea di tantu e tim komo e komishon ta bon delineá den e dekreto ministerial.
• E komishon a wòrdu instalá 1 di ougùstùs 2014, pues tin mas ku dos aña enkargá ku e tarea ariba menshoná.

Segun sr. Pisas, e kier suprayá ku e komishon aki no a wòrdu instalá pa tempu indefiní; pues ta prerogativo di e Minister di Hustisia ku ta atministrá e fondo pa por kambia e komishon aki.

Pues ningun momentu tabata mi intenshon pa eliminá e komishon aki, sino simplemente remplasá e miembro ku otro miembronan nobo.

Proyektonan ku e komishon aki aprobá mester di outorisashon di Minister di Hustisia pa por wòrdu finansiá.

Kada seis luna e Minister di Hustisia ta raportá (por eskrito) na Parlamento riba proyektonan den ehekushon.

E relato final di e Komishon ta wòrdu entrega na Parlamento den luna di desèmber.

E proyektonan
Na momentu ku el a tuma asiento komo Minister di Hustisia el a pidi e tim di ehekushon un relato di tur e proyektonan ku a wòrdu aprobá i/òf finansiá, pa asina haña un bista kla riba e situashon finansiero di e fondo.

E relato aki ta indiká lo siguiente:
Saldo entrante 30 desèmber 20126 fls. 13.461.912,47; Den luna di yanüari 2017 tabatin un depósito di: fls. 15.557,50; Saldo entrante 31 yanüari 2017: fls. 13.477.469,97; Proyektonan pagá te ku 27 mart 2017: fls. 01.446.645,95;
Saldo nobo: fls. 12.030.824,02; Proyektonan den 2016-2017 aprobá i ku mester wòrdu finansiá: fls. 4.420.549,07;
Saldo nobo: fls. 7.610.274,95; Petishonnan pa finansiamentu di proyektonan durante mandato di e minister anterior. Fls. 6.020.634,00;
Saldo final: fls. 1.589.640,95.

Aparte di esaki tin dos (2) petishon pa finansiamentu ku e tim a denominá ‘proyektonan den diskushon’, ku ta representá un suma total di fls. 1.370.640,36.
E minister anterior a purba malinformá e komunidat, splikando ku el a bai laga fls. 12.030.824,02 den e fondo.

Den su entrevista na prensa, konsientemente e ta laga di menshoná (1) e proyektonan ku durante di su mandato ya a wòrdu aprobá na un total di fls. 4.420.549,07 i alabes e proyektonan ku ta den tratamentu kual ta suma un total di fls. 6.020.634,–.

Segun Minister Pisas, pues ku e splikashon aki klaramente kada ken por konkluí pa su mes ken ta papia bèrdat.

Bron: Extra

Na nòmber di Gobièrnu: Abogado Peterson a reakshoná riba karta di Camelia

WILLEMSTAD. – Manera ta konosí, Den siman tras di lomba Abogado mr. Hubert ‘Berti’ Braam a manda un karta pa Gobièrnu di Kòrsou na nòmber di su kliente Universidat ICUC B.V. ku mr. Carl Camelia direktor di e Universidat, ku un ultimatum pa dia 25 di aprel, si Gobièrnu no manda un karta ku por probá ku Camelia a kobra 400 mil florin, anto nan lo kuminsá ku un proseso hudisial kontra Gobièrnu.

Den un komentario pa redakshon di EXTRA, abogado Braam a splika ku nan no a haña niun karta ainda manera ku nan a pidi, pero si nan a haña un yamada telefóniko di parti di abogado mr. Chester Peterson, ku Gobièrnu lo manda un karta pa Camelia.

Ku esaki abogado Braam por lo pronto ta wanta tur proseso i ta pendiente e karta ku ta bisa ku Camelia no a kobra ni un depchi.

Si e karta bin di un otro forma i ta bisa algu otro, e ora ei ku tur probabilidat e disputa aki lo keda atendé den sala di korte sivil.

Manera ta konosí ta trata di un disputa ku a surgi despues ku e Gobièrnu aktual lo a bisa ku Camelia a kobra kaba 400 mil florin pa e skol di polis riba nivel Universitario.

Ta trata di un proyekto ku tabatin konseho positivo riba dje i ku tur kos ta firmá i ta e plaka so lo mester a pasa den diferente montante pa e kuenta bankario di e skol.

Di un manera òf otro e plaka no a pasa i Gobièrnu a pidi pa Kontrolaria General wak e kaso un biaha mas i tambe e konsehonan positivo ku a sali.
P’esei Camelia ta di opinion ku si Gobièrnu ta bisa ku el a haña plaka, anto e tin di probá esei.

Bron: Extra