WILLEMSTAD.- Mester bini un plan di stabilidat ku lo tin ku mustra kon InselAir por normalisá mas lihé posibel, resultando den un kompania lukrativo. Esaki ta loke ta para den e akuerdo di fiansa ku gobièrnu a bai di akuerdo kuné ku InselAir. Gobièrnu ta fia InselAir un suma di 33 mion florin.
Basá riba e akuerdo aki Gobièrnu di Kòrsou a otorgá e fiansa di 33 mion florin, ku lo keda pagá konforme e ehekushon di un plan di stabilidat.
E tim di maneho lo finalisá e plan di stabilidat pa fin di febrüari 2017. A base di e plan di stabilidat lo palabrá e detayenan di e finansiamentu, ku lo kana paralelo ku e ehekushon di e plan. Un promé pago di 3 mion florin a keda pagá den luna di desèmber di 2016 komo adelanto riba e akuerdo aki. Awe a prosesá e di dos pago di 5.6 mion florin pa luna di yanüari 2017.
E tim di maneho, konforme e akuerdo, tin ku formulá un ‘businessplan’ mas detayá den tres luna, i laga e hunta di komisario aprobá esaki. E ‘businessplan’ ta enserá e strategia i tambe e metanan operashonal i finansiero pa e próksimo 3 añanan.
E ‘businessplan’ tambe ta deskribí e trayekto pa yega na un partner stratégiko, ku lo fortifiká e kompania ku kapital i konosementu (know how). Den e di kuater kuartal di 2017 lo kuminsá ku e selekshon di e partner stratégiko. Gobièrnu lo retirá na final di e trayekto aki.
Den kuadro di ehekushon di e akuerdo, Gobièrnu lo keda mantené e komishon di InselAir presidí dor di sr. Etienne Ys. E komishon na nòmber di Gobièrnu ta supervisá ehekushon di e akuerdo aki i ta konsehá Gobièrnu al respekto.
Partidonan tin pleno konfiansa ku e akuerdo aki a pone un base sólido pa garantisá e konekshonnan aéreo ku ta krusial pa Kòrsou, kaminda komunidat por konta atrobe ku un kompania di aviashon konfiabel i seif.
E konstelashon di e miembronan nobo di hunta di komisario i tambe e tim di maneho ta: komisarionan: Sr. José Jardim, presidente komisario, sr. Lars de Brabander. Sr. De Brabander tin amplio konosementu i eksperensia den industria di aviashon i ta un anterior gerente di Martinair Holland i KLM na Kòrsou, sr. Anthon Casperson, akountent i anterior CEO di Aqualectra.
Ehekutivonan den e tim di maneho: Sr. Gilles Filiatreault komo Presidente Ehekutivo, sr. Andre Delger komo CFO, akountent i anterior gerente na diferente kantor grandi di ouditoria na Kòrsou. Su último funshon tabata CFO na aeropuerto di Kòrsou (CAP).
Bron: Extra