WILLEMSTAD.- E tipo di malkontentu ku a surgi den PNP resientemente i ku a redundá den retiro di sra. Suzy Camelia-Römer no ta kos ku no a sosodé den e partido.
Ta na vários okashon den historia dje partido esaki a sosodé, aunke e ta di lamentá. Partido Nashonal di Pueblo no por mira den futuro i no sa si por papia di un rekonsiliashon. Pero p’e momentunan aki e kapítulo ei ta será. Asina mr. Ornelio “Kid” Martina a duna di konosé ayera tardi durante un enkuentro ku prensa konvoká pa PNP. T’asina ku riba inisiativa di e propio PNP a toka e tema di retiro di Camelia-Römer i sr. Martina a duna un splikashon.
Segun Martina, fo’i despues di kaida di Gabinete Koeiman na febrüari, direktiva di partido konhuntamente a yega na e konklushon ku Humphrey Davelaar lo bai enkabesá e lista.
Den e siguiente reunionnan di direktiva di PNP, direktiva a bai di akuerdo, konforme su statutonan ku e lider polítiko aktual lo ta e kabesante di e lista di PNP pa e elekshon di 28 aprel próksimo.
E desishon aki a wòrdu anunsiá formalmente na tur parlamentarionan i ministernan den funshon pa PNP, ku ya kaba tabata di akuerdo ku e lider polítiko aktual lo a liderá e lista pa elekshon benidero.
Den un siguiente reunion di direktiva ku tabata dia 2 di mart 2017 direktiva a risibí un karta di 15 miembro (firmante) ku ta pidi un reunion general ku e tópiko kabesante di e lista di elekshon 2017.
Basá riba e karta aki direktiva a tuma un desishon ku un komishon lo bai sinta papia ku e grupo pa sa kiko presisamente ta e propósito i tambe informá nan kiko tabata e desishon di direktiva riba e punto aki ku ya kaba a wòrdu akordá. Mester bisa aki ku e grupo entre tantu a bira ménos paso no ta tur hende a haña splikashon eksakto di e kontenido i e meta di e karta (di e grupo di 15) i esakinan a distansia nan mes for di e karta despues.
Den e reunion aki a yega na e palabrashon ku e komishon ku a sinta ku e firmantenan mester a bai bek direktiva i splika e inkietutnan i deseonan di e grupo aki. No opstante e palabrashon aki dia 5 di mart 2017 un konvokashon a wòrdu saka pa un reunion di miembresia pa dia 7 mart 2017 ku e úniko punto di agènda ku ta desishon riba kabes di lista PNP pa e próksimo elekshon.
Den e siguiente reunion di direktiva, pa diskutí e konvokashon aki, a sali lo siguiente:
E konvokashon ku a sali no ta konforme artíkulo 33 insiso 2 di statuto PNP. Lo mester tin 4 dia entre e konvokashon i e reunion.
Tambe direktiva ta di opinion ku e punto di agènda ku ke wòrdu diskutí “ken ta enkabesá lista di elekshon 28 di aprel próksimo” segun statuto ta netamente tarea i prerogativa di direktiva pa disidí i no di membresia general.
Pero segun Martina e tipo di desaroyonan aki no ta promé biaha. I pa PNP e kaso aki ta será. EXTRA a puntra sr. Martina si tin espasio pa rekonsiliashon den futuro, i el a deklará ku e no por wak den futuro, pero por lo pronto kada ken lo tin di sigui nan propio kaminda. Nos a puntra liderazgo di partido si por papia anto di un proseso di purifikashon, i nan a splika ku nan no ta riska papia di purifikashon, pero si nan por bisa ku e ambiente den PNP ta den bon esfera.
Bron: Extra