WILLEMSTAD.- ayera mardugá, Kuerpo Polisial huntu ku otro instansianan manera e.o. Ministerio Públiko, KMar, Wardakosta, RST i VKC a tene diferente entrada hudisial riba nos isla. Durante di e entradanan hudisial aki, a detené e hòmber J.S. de J. di 23 aña di edat nasé na Kòrsou, pa atrako.
Na un kas den Orchillaweg, a detené e hòmber R.R.E. di 29 aña di edat nase na Kòrsou, en konekshon ku lei di Opio. A konfiská tambe un arma di telefòn, algun telefòn selular i tambe 4 chaleko anti- bala. Den oranan di mèrdia a tene kontrol di tráfiko na algun sitio i a repartí un total di 61 prosèsverbal, miéntras ku a detené 3 estranhero ilegal.
Funshonarionan di Ministerio Públiko (OM) tambe a forma parti di e kontrol di tráfiko ku a tuma lugá na entre otro na altura di Palu Blanku, entre tres’or (3:00) pa seis’or (6:00). For di investigashonnan resien i informashonnan di siudadanonan, por a konkluí ku diferente gruponan kriminal konosí, ta hasiendo nan mes kulpabel na e.o. kasonan di atrako. En konekshon ku investigashon ku polis a hasi último simannan, a detené den fin di novèmber dos miembro di un di e gruponan aki en konekshon ku poseshon ilegal di arma di kandela.
Durante di e akshon di awe a haña diferente artíkulo ku ta prosedente di atrakonan di último tempu. Den Luna di novèmber mes polis a detené dos miembro di e ‘gang’ ‘Army’. Ayera den kuadro di un ‘follow up’ polis a bolbe bai hasi un investigashon den área di Cabo Verdeweg/ Seru Fortunaweg na unda e ‘gang’ aki ta move. Sr. Imro Zwerwer bosero di Kuerpo Polisial, a enfatisá ku e akshon ta kontinuá tur e dianan aki pa tantu prevení aktividatnan kriminal ku tin tendensia di oumentá den fin di aña. Tambe lo tin unidatnan di Mantenshon di Orden Públiko ku ta atento pa kualke mèldu di atrako pa reakshoná inmediatamente.
Komunidat por ta trankil paso polis tin atenshon pa e ‘gang’-nan aki i por konta ku den e dianan ku ta sigui lo kontinuá ku e akshonnan masal aki. Kuerpo Polisial ke kita e persepshon robes ku ta biba, ku e tin difikultat pa atendé ku e gruponan kriminal aki. Polis ta sigui traha ku e determinashon di semper i lo no bèk pa ningun persona i/o grupo kriminal ku ke trata na desbalansa komunidat ku nan operashonnan.
Bron: Extra