WILLEMSTAD. – Tin rumornan insistente ta sirkulá ku un grupo chines a kumpra Girobank. EXTRA a trata di buska kontakto ku esnan ku por sa di e posibel benta, pero no tabata posibel haña niun hende ku por a konfirmá un ke otro.

Tin un inkietut masha dia kaba den Girobank bou di empleadonan ku no sa kiko ta bai pasa, dor di kada bes rumornan ta sirkulá di un ke otro relashoná ku benta di e banko.

Nan ta tende ku ta grupo venezolano, despues ta un grupo di Kòrsou mes, awor ta sirkulá ku ta grupo chines.

Segun un fuente hopi yegá ku e desaroyo den e banko a duna di konosé ku e grupo chines lo a kumpra kaba òf lo ta hopi leu den e kompra.

Lo bai tin hopi kambio ku lo tuma lugá.

Empleadonan mes no sa di nada i kada bes gerensia ta sali i bisa nan ku no tin nada ta tumando lugá i pa no tin pániko ni tenshon, pa motibu ku tur kos ta trankil.

Den kurso di awe EXTRA lo sigui buska pa sa kiko ta e desaroyo ku tin den e banko en kuestion.

Bron: Extra