WILLEMSTAD.- Tin hopi diskushon den partido MAN tokante posishon ku frakshon a tuma resientemente durante reunion di parlamento ku estudio di ‘bachelor’ pa polis.
Motibu pa e diskushon ta diferensia di opinion den partido tokante e tópiko. Djamars pasá frakshon di MAN no a sostené moshon pa stòp e proyekto i outorisá pa Kontrolaria General hasi un investigashon profundo riba e “Rechtmatigheid i Doelmatigheid” di e proyekto aki. Pero despues di reunion frakshon di MAN a urgi minister di Hustisia Nelson Navarro pa manda e ‘dossier’ di estudio di ‘Bacelor Policing’ kompletu pa Kontrolaria General di Kòrsou pa un evaluashon riba ‘doelmatigheid’ i ‘rechtmatigheid’ di e proseso ku a keda hiba.
Gassan Danawi, number 5 riba lista di partido MAN, a skirbi djárason riba su wèpsait: ‘Personalmente mi ta haña ku mester a warda pa aprobá e akademia i opleiding pa polis aki. Gobièrnu nobo lo sinta pa mas tardá dentro di 2 siman; dikon mester a pasa esaki asina lihé? Mi ta wardando pa haña un splikashon interno promé ku mi duna mi opinion konkreto òf final.” E mensahe a haña hopi reakshon riba Facebook.
Segun fuentenan remarke di Danawi no a kai den bon tera di partido. Danawi su mes a splika EXTRA ayera ku e no ke duna mas atenshon riba e mensahe i ta preferá pa diskutí interno tokante e tópiko.
Otro miembro den partido ta spera ku esaki ta kousa mas diskushon den partido. MAN a drenta elekshon ku e promesa pa para pa bon gobernashon, transparensia, kontrol i kombatí korupshon i lo no desviá for di esei. Tin hende den partido ku ta bisa ku mester ta kla ku parlamentarionan di MAN no mester traha komo ‘rubber stamp’, pero vota riba prinsipionan di partido.
Bron: Extra