WILLEMSTAD.- E gerente general di Curaçao Airport Partners (CAP, Ralph Blanchard ta rekonosé ku e problemanan di InselAir a afektá aeropuerto. “pero nos lo bòns bek”, asina Blanchard a deklará ayera.

E gerente general a ekspresá optimismo tambe ku invershonistanan lo sigui konsiderá Kòrsou un lugá interesante pa nan invershonnan. Opviamente ku e situashon aktual ta di atenshon pero e ta konvensí ku lo surpasá e situashon aki.

Blanchard a bisa ku e tipo di kosnan ku ta pasando na Kòrsou ta pasa den tur pais. “No opstante esei, e perspektivanan pa Kòrsou ta hopi bon. Nos ta hasiendo tur loke nos por pa move kosnan den bon direkshon. Loke mester wak bon ta e publisidat ku e tipo di kosnan aki ta generá internashonalmente. Mi ta spera ku nos por tene e informashonnan mas lokal posibel pasobra awendia tur kos ta plama rònt mundu. Biahamentu ta un kos masha sensitivo i mester tene kuenta esei. Mi mes ta haña preguntanan konstante di hopi hende ta kiko ta pasando”, asina e ta bisa.

Pa loke ta trata e desaroyonan di operashon di CAP na aeropuerto, Blanchard a rekonosé ku esei sigur ta e kaso. Si wak e sifranan, tin un bahada signifikante di aktividat na aeropuerto. E desaroyonan na InselAir sigur a afektá nos. E situashon aki a manifestá sigur i nos ta mira esei den e sifranan ku nos tabata kier realisá den e próksimo dos aña. Nos ta mira ku tin un brecha awor aki, pero di otro banda Kòrsou ta un merkado fuerte. Pero bèrdat ta ku nos mester dil ku e brecha ku a surgi. Merkadonan di Oropa, Suramérika i di Merka ta mustra alentador. Nos ta spera di mira kresementu riba término kòrtiku. Ekspertonan eksterno tambe a yega na e mesun konklushon. Riba término kòrtiku nos lo tin retonan pero nos tin ku reagrupá i futuro ta mustra hopi bon. Nos lo traha agresivamente riba esei”, asina Blanchard a bisa.

Otro sektornan ekonómiko tambe a ekspresá preokupashon pa e desaroyonan ku tin awor aki. For di ougùstùs aña pasá, Kòrsou ta den gara di diferente desaroyo, entre nan aspektonan di elekshon ku te awe no a konkluí ku stabilidat polítiko. Den sektornan importante di ekonomia tin miedu ku no solamente lo sinti e impakto aworakí pero tambe riba término mas largu. “Hopi biaha e kosnan aki ta sigui manifestá pa lunanan largu i tin biaha pa añanan largu”, asina un analista ekonómiko a bisa ayera.

Bron: Extra