WILLEMSTAD/ PHILIPSBURG.- E prominente miembro di gèn NLS (No Limit Soldiers) di Koraal Specht, Urvin “ Nuto” Wawoe ( 34) a keda kondená pa korte di apelashon na 40 luna di prison pa poseshon di un kantidat basta grandi di mariwana, kokaina i tambe arma di kandela.
Nuto a apelá e sentensia aki ku el a haña den korte di promé instansia den mei 2014. El a keda sentensia na 6 aña pa ta forma parti di un organisashon kriminal, poseshon di kokaina, mariwana i tambe arma di kandela.
Tres siman pasa ku e kaso a keda trata den apelashon, abogado general Taco Stein a pidi 6 aña di prison atrobe pa Nuto.Nuto a keda defendé pa un dje abogadonan di mas renombre na Ulanda ku ta Inez Weski ku a pidi korte pa apsolv’é su kliente di tur akusashon.
Nuto mes no a presentá pa tratamentu di e kaso den korte debí ku e ta sera na Ulanda for di novèmber di aña pasa, debí na un insidente violento ku a tuma lugá den prison Point Blanche unda e tabata sera. Korte apelashon a rechasá loke defensa a trese dilanti pa deklará ministerio Públiko no atmisibel den su demanda. Korte di apelashon no a haña ku tin sufisiente prueba ku Nuto lo ta forma parti di un organisashon kriminal. Nuto tambe a nenga di ta lider di un gèn kriminal òf kualke organisashon kriminal.
Tambe korte ta haña ku e kantidat di kokaina ku inisialmente a kondená e akusado na dje, a keda redusí na 2 kilo i 714 gram. A haña e kantidat di kokaina den baki di outo ku Nuto tabata kore promé di a keda detené.
Tambe el a trata di skonde un saku ora polis a yega na e sitio. E otro 1 kilo i 130 gram ku a haña den otro outo no por keda pone pa Nuto, korte ta haña.Wawoe a atmití ku e mariwana ku a haña den un tas di Gucci ta di dje. Dia 17 sèptèmber 2013 Wawoe a keda detené na The Keys ora e tabata huntu ku tres otro tipo. Un patruya polisial ku a pasa den bisindario a sinti holó di mariwana. Polis a disidí pa kontrolá e tres vehíkulonan ku tabata stashoná den e área. Durante di kontròl a topa ku 3.8 kilo di kokaina, US$ 25,000 kèsh, un kantidat chikí di mariwana i dos arma di kandela.
Den telefon di Nuto por a mira fotonan di e armanan kual ta semioutomátiko, dos pistol i tambe lachi pa karga e balanan.
Wawoe ta nenga tur akusashon, pero abogado general Taco Stein ta konvensí ku Wawoe i otro miembro di NLS tabata negoshando asuntu di droga na The Keys. Stein a bisa ku tin sufisiente prueba i evidensia ku e akusado ta dil den droga i a pidi korte pa kondená Wawoe na 6 aña di prison.
Ayera e kondena a baha e kastigu pa Nuto.
Bron: Extra