WILLEMSTAD.- Pronto lo kuminsá e proseso di solisitut o pa un Prokurador-General nobo ku lo mester remplasá esun aktual Guus Schram.
Informashonnan ku EXTRA a haña ta hasi menshon di e echo ku e kontrakt di e PG aktual Guus Schram ta vensiendo. Schram a bai di akuerdo pa stashoná durante 3 aña na Kòrsou, Sint Maarten i Islanan BES i e periodo ta yegando pa e baha for di e puesto. Anke e ta haña e trabou hopi interesante, i a trese kambionan fundamental den e forma di ópera di Ministerio Públiko, e ta regresá Ulanda pa motibunan familiar.
Ta resultá ku su kasá tambe ta hurista i un fiskal, pero no por traha na Kòrsou pa motibu di e konflikto di interes ku tin di un hurista/fiskal ku su kasá ta PG. E señora kier sigui ku su karera, i ta bou di sierto kondishon el a bai di akuerdo pa bin biba na Kòrsou durante 3 aña.
E preferensia pa un PG nobo ta pa un ulandes karibense na promé lugá, pero den pasado a resultá difísil pa haña hendenan ku trayektoria i di bon integridat pa okupá e puesto aki riba e islanan di e 5 islanan ku e PG lo bai traha p’e.
For di tempu ku Aruba a haña su status outónomo, Aruba tin su mes Prokurador-General. Despues di e kambionan di 10-10-10 a disidí ku Kòrsou, Sint Maarten i Islanan Bes tin nan mas Prokurador General komun. Kuater aña pasá a tene un proseso di solisitut pa wak si tin interes riba e 5 islanan di kandidatonan pa bira P.G. No tabatin interes.
E problema grandi den e tipo di puestonan aki ta pa traha komo PG den un ambiente tòg hopi kompliká i volátil. Ta bin aserka tambe aspektonan di seguridat ku mester tene kuenta kuné pa kua un kandidato lokal no kier hinka su mes den e tipo di situashonnan aki. E espektativa ta kisas ku e biaha aki, no opstante e faktornan aki, lo logra haña kandidatonan lokal. Si esei no ta e kaso, lo mester buska un biaha mas un kandidato for di Ulanda.
Despues ku kandidatonan solisitá, ta tres minister huntu mester disidí riba e PG nobo. Den e struktura aktual, i a base di e leinan di konsenso, e Prokurador General mester haña aprobashon di e ministernan di hustisia di Kòrsou, Sint Maarten i Ulanda (bou di kua islanan BES ta kai).
Lo publiká e aviso pa buska un Prokurador-General nobo próksimamente. Den pasado tabatin yunan di tera ku tabata Prokurador-General. Den dékada 70 i 80, Luis Nahr tabata Prokurador-General. Robert Pietersz, miembro di Korte, a asumí e posishon pa algun aña. Despues e puesto tabata den man di Frits Goedgedrag ku a bira Gobernador despues. E último yu di tera ku tabata Prokurador-General tabata Dick Piar. Despues a bin Guus Schram i e espektativa ta ku kisas e biaha aki por bolbe instalá un di tera òf un persona di taya di Karibe ulandes, na e puesto aki.
Na Ministerio Públiko mes awor aki tin yen di yu di tera ku ta trahando komo fiskal i ku por bin na remarke, meskos ku ta e kaso na Korte Komun. No ta masha kla si nan ta interesá pa solisitá pa e puesto. Riba foto e PG aktual, Guus Schram.
Bron: Extra