WILLEMSTAD.- ‘ Ta importante ku pueblo di Kòrsou ta na altura di ròl di Ministerio Públiko den kuadro di realisashon di Enkuesta Sivil di kompanianan di gobièrnu. Si Ministerio Públiko tin nada di skonde ta hopi bon.

Pero tin sufisiente motibu pa kuestioná envolvimentu di nan den realisashon di e rapòrt ku mr. Willems a entregá.” Asina abogado Douwe Boersema ta splika. Ayera el a manda karta na minister di Hustisia pa haña tur korespondensia di Ministerio Públiko. Boersema ke tira un bista den e mailnan, kartanan, konsehonan etc. ‘Tin hopi hende ku ta kritiká kalidat di e rapòrt di Willems. Manera Refineria di Kòrsou, nan ta kaba ku e rapòrt. Mi ta komprendé e krítika. Tambe tin hende ku ta bisa ku Ministerio Públiko ta traha huntu ku mr. Willems pa haña un motibu pa kastigá sierto hende.”

Manera ta konos í Ministerio Públiko (OM) den un karta dia 26 di ougùstùs último, konforme artíkulo 2.282 di “Burgelijke Wetboek”, a entregá un petishon na Korte pa a base di e rapòrt di Enkuesta Sivil ku a mustra riba mal maneho na e kompanianan di gobièrnu Refineria di Kòrsou, Aqualectra i Curoil. OM den su karta na Hof a bisa ku a base di e rapòrt di mr. Willems, pa fiha ku tabatin kuestion di mal maneho na e kompanianan menshoná i tambe pa indiká esnan responsabel p’e mal maneho.

Na mes momentu Ministerio Públiko ta pidi e tres kompanianan di gobièrnu pa nan hasi tur loke ku ta posibel pa ‘kobra’ esnan responsabel p’e mal maneho na e kompanianan en kuestion. OM ta spera ku en bèrdat esnan responsabel ta keda atendé.

Boersema no ke antisipá riba ròl di OM. ‘Tin motibu pa duda nan embolbimentu. Pero promé ku mi ta bisa algu definitivo, mi ke wak tur e korespondensia di Ministerio Públiko den kuadro di realisashon di Enkuesta Sivil pa haña klarifikashon. Basá riba esaki mi lo fórmula mi punto di bista.”

Bron: Extra