WILLEMSTAD,- Movementu PUSH Kòrsou ayera a entrega nan lista. Riba e lista tin nòmber di 12 persona. Ydellienne Heerenveen ta number 1 di e lista.

El a lanta e partido. Komo reakshon riba turbulensia den mundu polítiko el a sinti e nesesidat pa lanta un partido ku hende ku por restablesé konfiansa di pueblo bek den nos mundu polítiko. Segun Heerenveen gran parti di pueblo di Kòrsou no tin konfiansa mas den partidonan tradishonal. Personanan ku ta riba lista di Movementu PUSH tin intenshon pa hasi polítika limpi i sin mustra dede.

Heerenveen a sera konosí ku mundu polítiko for di edat yòn. Su mama tabata un di e inisiadó di PLKP, Heerenveen a bisa prensa ayera. ‘Na kas semper nos a diskutí hopi. Mi mama a siña mi pa diskutí i argumentá.’

Intenshon di PUSH ta pa ‘drenta den bario i papia ku hende’. Tambe PUSH ke mehora situashon di mamanan soltero ku ta biba bou di sirkunstansianan malu. Heerenveen ta hopi aktivo riba media sosial i ke usa kontakto via media sosial pa motivá hende pa voto pa PUSH.

Bron: Extra