Extra | Rapòrt evaluashon esensial kon pa sigui realisá hospital nobo

Rapòrt evaluashon esensial kon pa sigui realisá hospital nobo | Extra

WILLEMSTAD.- Gabinete Koeiman den nan akuerdo di gobernashon 2016-2020 tin hopi plan pa ku salubridat. Un di nan sigur ku a hala atenshon ta hospital nobo. Esaki sigur ta un dje puntonan ku e gobièrnu aki lo tin di bai atendé, mirando kuantu diskushon tin rondó di HNO.
Den e akuerdo di gobernashon ta bisa ku Hospital Nobo Otrobanda mester ta garantisá pa duna kuido igual di kalidat haltu, duradero i pagabel, den kual e personal lo ser eduká i formá pa kontribuí na esaki. Mester tene na kuenta e proseso di transishon. Basá riba e rapòrt di evaluashon, gobièrnu lo tuma desishonnan nesesario kon pa sigui realisá e hospital nobo.

Gobièrnu lo bai evaluá e lei di Seguro Básiko di e lei di labizjan, i kaminda ta nesesario lo adaptá e lei i hasié mas efisiente. Atenshon spesial lo bai pa esnan ku no ta inkluí den e pakete básiko ainda. Refiriendo na resultado di konklushonnan di diálogo nashonal, gobièrnu lo regla edat di penshun den lei laboral pa evitá oumento di pobresa bou di personanan di 60 aña pa 65 aña. Lo bai duna atenshon na e problemátika di esnan di edat entre 60 i 65.

Tambe gabinete Koeiman a indiká di lo traha na e konsekuensia di eskases di spesialista. Esta e tempu di espera pa un sita ta oumentá i esaki ta inaseptabel.
E gobièrnu aki ta bisa di ta konvensí ku mester baha e tempu di espera aki, i esei por tuma lugá dor di stimulá dòkter pafó di pais pa nan bin bek, i tambe dor di trese mas spesialista for di eksterior. Esaki lo rekerí evaluashon di e maneho eksistente di atmishon di spesialista.

Prevení ta mihó ku kura. Gobièrnu lo tin komo punto pa lansa loke ta trata salú públiko, pa logra pa kada siudadano tin un salubridat di kalidat, aksesibel i pagabel. Tambe pa krea un ambiente di bida saludabel. Huntu ku esei tin ku buska e balansa entre poblashon ku ta embeyesé i gastunan di salubridat públiko. Lo pone hopi énfasis riba duna informashon na komunidat.

Gobièrnu lo karga su responsabilidat dor di informá i eduká ku programanan den media i na skolnan kon pa biba salú. Pasombra kuido di hende mester ta dirigí riba prevenshon di malesa i strès. Kura malesa ta importante, pero mas importante ta hasi pueblo konsiente kon e mes por yuda kuida su salú. Biba salú dor di kome salú i moveshon, komo elementonan determinante di prevenshon lo ser promové.

Via medionan sosial lo stimulá bon alimentashon i lo desamina uso di supstansianan dañino pa salú di komunidat. Lo pone énfasis tambe riba salú mental i maneho pa prevení adikshon espesial pa hóbennan. Lo promové moveshon i rekreashon masal kreando mas fasilidat di deporte i infrastruktura den áreanan urbano.

Tambe lo forma mas lider di formashon físiko i deporte pa funshoná den barionan. Lo stimulá un maneho kaminda dòkternan di kas ta biba i funshoná dje e bario. Lo duna informashon riba malesanan króniko i riba komportashon seksual bou di hóbennan.

I finalmente inspekshon mester keda insentivá den instansianan di kuido.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *