WILLEMSTAD.- Despues di e likidashon ku a tuma lugá den Lindberghweg mesora riba retnan sosial a kuminsá sirkulá ku ta trata di e konosido rapper ‘Becholize’. Komo media responsabel EXTRA no por publiká su nòmber sin risibí konfirmashon ofisial di Kuerpo Polisial.

Sinembargo entre tantu bosero polisial Imro Zwerwer a duna di konosé ku ta trata di Edrich Kopra mihó konosí komo ‘Becholize’ di 25 aña di edat.

Segun rumornan persistente ku ta sirkulá, e chispa ku a kondusí na e likidashon aki tin di haber ku un problema ku a surgi den Nolly’s Place nèt den e último siman di aña 2016. Riba e dia ei un otro rapper di inisial R. ku ta konosí pa su kansionnan ku lírika ‘gangsta’ tabata bai kuminsá basha un rèp pa ‘diss’ Becholize, pero diripiente un suheto, no ta muchu kla si ta trata di un amigu di Becholize, a subi stage i kita mikrofon fo’i R. Hopi a spera ku R. lo no a aseptá e kos aki, pero el a sorprendé un i tur dor di keda masha trankil mes. E kantidat di krítikanan ku e rapper aki a risibí tabata enorme pasó hopi tabata di opinion ku tabata e momento pa e demostrá ku e ta un ‘real gangster’. Sinembargo afortunadamente e asuntu no a eskala.

Loke a sigui despues tabata masha hopi komentario/video riba Facebook kontra di R. E víktima Becholize i un kantidat di otro rapper mas, a produsí video kaminda nan tabata duna nan komentario ku palabranan fuerte den direkshon di R. Esaki ta duna di pensa ku likidashon di Becholize por ta vinkulá ku e asuntu aki.

Imro Zwerwer a bisa ku Polis ta na altura di e problema ku tabatin den Nolly’s Place i ta hasi e investigashon nesesario pa wak si e asesinato i esaki ta konkretamente konektá. Awor tur kos ta den man di Kuerpo Polisial pa akumulá e evidensianan nesesario, pa asina saka na kla ken ta esnan ku realmente ta responsabel pa e likidashon aki. Palabra di fortalesa ta bai na famia di e defuntu.

Bron: Extra