WILLEMSTAD.- For di e desishon di Hues Komisario relashoná ku un petishon konforme artíkulo 56 di Kódigo di prosedura penal, a sali na kla ku resientemente Ministerio Públiko a bolbe tende Elmer “Kadè” Wilsoe komo sospechoso.
Esaki a hasi situashon mas difísil pa kita e status di sospechoso for di Wilsoe.
Manera ta konosí dia 29 di sèptèmber tras di lomba Hues Komisario a trata e petishon ariba menshoná pa terminá e investigashon ku tin kontra di Wilsoe.
Punto di salida di Wilsoe i su defensa ta ku te ku awor aki, dos aña despues ku a tende Wilsoe den luna di ougùstùs 2014, no a bin nada nobo kontra di Wilsoe ku por hustifiká mantenshon di e status komo sospechoso den e kaso asesinato Wiels.
Esaki ta pone na opinion di Wilsoe ku no por hustifiká pa sigui mantené den situashon ku e ta awor aki.
Pa e defensa t’asina ku e periodo di término rasonabel di investigashon a pasa masha dia i kada bes ku puntra Ministerio Públiko kon ta pará ku e investigashon, no ta bin kontesta.
Entre tantu e investigashon ta tarda i konsekuentemente henter bida di Wilsoe a bira insoportabel.
Situashon den su bida privá i tambe pa su partido Pueblo Soberano a tacha integridat di Wilsoe.
Pero e loke ku hues komisario a nota den su desishon ta indiká i ku ta hasi e situashon di Wilsoe aun mas kompliká i difísil, ta e echo ku resientemente dia 23 di sèptèmber, Ministerio Públiko a bolbe tende Wilsoe komo sospechoso den e kaso aki.
E fecha nan anterior ku a tende Wilsoe tabata, dia 17 i 22 di yüli 2014.
Esaki ta hasi ku e posishon di Wilsoe ta keda difísil i Hues Komisario a duna di konosé ku e no ta mira ku Ministerio Públiko a tarda di tal forma ku e tardansa ta inhustu.
Hues Komisario ta haña ku Ministerio Públiko a hasi avansenan signifikante den e investigashon aki i p’esei e no por honra e petishon di Wilsoe pa obligá Ministerio Públiko para e investigashon òf stipulá un fecha aki mester stòp e investigashon.
Esaki ta trese kuné ku Elmer “Kadè” Wilsoe por lo pronto lo keda un sospechoso den e kaso asesinato Helmin Wiels.
Bron: Extra