WILLEMSTAD.- Presidente di Parlamento no por disidí sin mas ku ta saka tur hende for di tribuna durante un reunion públiko. Tin prosedura pa hasi esei, i e no a kumpli kuné. Pues un biaha mas el a faya.
Esei eksponente di MFK i eks hefe di Seguridat, sr. Rigo Thode, a duna di konosé den un entrevista na prensa despues di a bandoná e balkon di públiko ayera mainta. Manera ta konosí, na prinsipio di e reunion di Staten ayera mainta a surgi un interkambio di palabra entre srs. Gerrit Schotte (MFK) i presidente di Parlamento sr. Humphrey Davelaar, i dado momentu e último aki a haña ta nesesario pa ekspulsá Schotte.
Ora ku e públiko den tribuna a kuminsá protesta el a manda un atvertensia i despues disidí ku a hasi e tribuna tambe bashí.
Thode tabata un dje personanan den tribuna i a splika ku e presidente tabata hopi robes. Ta djis algun persona a murmurá i grita, pero nada grave ku tabata nesesario pa hasi e tribuna bashí. El a lansa un atvertensia. Segun Thode, pa hopi aña e tabata hefe di seguridat i e konosé e reglanan. Den e kaso aki presidente mester a partisipá den su ‘mike’ ku tin di ‘ontruim’ e tribuna, i esei no a sosodé. Pues e sa su derechi i si e tabata ke e lo a keda sin nada por sosodé.
Segun Thode, tabata su ruman Amerigo i Gerrit Schotte ku a bis’e pa Sali numa. Pero es mas, esun ku Davelaar a ordená pa saka for di sala mes a keda den sala sin polis a sak’e, ku ta Schotte. Pues Davelaar a aktua hopi malu den e kaso aki.
EUSTATIUS
Mas aleu meimei di esnan ku a forma parti dje públiko tabatin abogado sr. Anthony Eustatius, i el a mustra ku lo ta un bon kos si nos polítikonan di awendia hasi nan hùiswèrk i sa kiko ta Reglamento di Orden i kiko ta Trias Politica.
Segun Eustatius, tin polítiko ta bisa ku nan sa kiko ta Trias Politica, pero defakto nan no sa, pasobra nan ta brua e pilánan den otro. Pa bo bira un polítiko bo mester sa a lo ménos kon Trias Politica ta funshoná.
Si tin di kompará e konosementu di polítikonan di ántes, tempu di srs. Rufo McWilliam, Jonckheer, Evertsz, nan tabata sa nan Reglamento di Orden mihó ku esnan djawor Nan ta apliká esaki hopi robes tambe. E konklushon ku por yega na dje ta ku, sea nan ta abusando di nos derechonan estatal, òf nan no ta komprondé kiko nan ta hasiendo.
Bron: Extra