WILLEMSTAD.- Ayera tardi e rifero Robbie Dos Santos a hasi un deklarashon di no ta den ningun porkeria. Opviamente e deklarashonnan aki ta relashoná ku su persona ku ta sospechoso den kaso Maximus ku ta likidashon di e lider di partido Pueblo Soberano, Helmin Wiels dia 5 mei 2013.

Siman pasá djabièrnè a bira públiko un dokumento di RST ku ta investigando e kaso Maximus, den kual ta aparesé nòmber di Robbie Dos Santos komo un dje sospechosonan. Den e dokumento ta bisa ku Dos Santos a paga Nini Fonseca sèn pa regla morto di Helmin Wiels. P’e kaso aki a detené Dos Santos dia 29 yüli 2014 i promé ougùstùs 2014 a suspendé su detenshon.

E deklarashon di Robbie riba FB di Robbie’s Numbers ta lo siguiente: “Bon tardi na un i tur, mi nòmber ta Robbie Dossantos, konosí pa tur via tur media sosial. Ultimamente mi nòmber ta wòrdu uzá hopi..

Tur dia di nobo ora mi lanta mainta, mi ta gradisí Dios pa un dia mas i alabes mi ta pidié pordoná tur esnan ku ta lanta falsu testimonio riba mi. Mi ta un persona di poko palabra i hamas i nunka lo hasi daño na niun persona. Niun hende no sa mi bèrdat, tata mi ta pidi bu atrobe pordon pa nan. Mi ta kere den bondat, mi no sa odia ni warda renkor. Den pasado mi a ser hòrtá i atraká, mi a pidi Dios yuda nan pasó nan no sa kiko nan tabata hasi.. Unda a sali ku mi persona ta paga pa mata un ser humano, ta un tristesa i un invento di otro mundu !!!!

Mi mes tin gana di sa dikon i pa ki motibu ta kulpa mi persona. Mi kaba di sali for di kaso Bientu. Di kual mi tabata 24 ora bou vigilansia, tur mi “telefoon gesprek” nan tabata ser skuchá, mi mester a pidi pèrmit pa sali for di Kòrsou, e tabata un kaso di hopi doló i desesperashon …ami sa ken mi ta i sa unda mi ke bai den bida, den porkeria sigur lo bo no haña mi. Robbie Dossantos”.

Bron: Extra