Met schokkende foto’s en videobeelden vanuit de lucht

WILLEMSTAD.- Rode Kruis a habri kuentanan na banko pa yuda e islanan S.S.S., esta St. Maarten, Statia i Saba.

E kuentanan ku por depositá bo kontribushon ta: MCB “account” number 2004, Banco di Caribe 23070701 GIRO 1112261, ORCO 101968-420, RBC 12.32.5844, i Vidanova 545454-001.

Pa mas informashon por tuma kontakto ku Rode Kruis, Fokkerweg 5, telefòn 461-4630, òf mail: [email protected]

Treasurer: [email protected], i “website”: http://www.kruskorakorsou.com.

Bron: Extra

Irma a okashoná masha hopi daño na isla di St. Maarten

WILLEMSTAD. – E promé ‘update’ di situashon na St. Maarten despues di orkan Irma a pasa ku hopi bientu i áwaseru, ta mustra ku tin hopi daño. Kasi no ta posibel mas pa yega na e isla. Asina Defensa a konkluí despues di un investigashon.

Terminal di krusero i pirnan den haf ta kompletamente destruí. Aeropuerto di St. Maarten no por funshoná, pasobra pista di aterisahe a keda totalmente daña.
Toren di trafikashon di aeropuerto na St. Maarten a kibra i kai riba pista di aterisahe. St. Maarten lo no tin un pista di aterisahe adekuá pa e siguiente dos lunanan ta sigur.

Tampoko lo no tin aviashon sivil entre St. Maarten i otro pais pa e siguiente temporada. Defensa di Ulanda lo yuda pa establesé un konekshon provisorio. Na mesun momento lo traha pa drecha aeropuerto di St. Maarten.

Pa duna protekshon na e pueblo, Sint Maarten tin diferente ‘shelter’ ku a habri nan porta ayera. Pero mayoria di nan ta yen ku hende ku no tin un kas ‘seif’ mas. Intenshon ta pa ekspandé e kantidat di ‘shelter’. Orkan José lo pasa St. Maarten durante wikènt benidero. Ta importante ku St. Maarten awor ta prepará su mes pa e orkan nobo aki. José lo no ta mesun fuerte ku Irma, pero probablemente lo bin ku hopi áwaseru, ku ta hopi fèrfelu, pa motibu ku bastante kas a pèrdè parti di nan dak òf daknan kompletu ku bishita di orkan Irma.

Bron: Extra

Situashon riba St. Eustatius no ta bon

WILLEMSTAD.- Segun Walter Hellebrand di Monuments Foundation na Sint Eustatius, situashon riba e isla no ta bon. Ayera el a splika ku riba kayanan el a mira hopi palu ku a kai. Palunan ku a kai riba kaminda, pero tambe palunan ku a kai riba kasnan. Palunan di lus i liña di telefòn a kibra. Ayera liñanan di telefòn no tabata funshoná. Tambe tabatin problema ku elektrisidat.

Hellebrand a splika Ret Karibense ku “tin hopi daño kaba, pero si José tambe pasa lo ta un desaster.”

Komunikashon riba kasi tur e islanan a kai: ta via internèt so por alkansá Hellebrand ainda. E no por alkansá su ruman ku ta biba na Sint Maarten. “Delaster kos ku mi a tende ta ku tabata impetuoso: tur kos ta destruí.”

Hellebrand ta bira emoshonal ora e kòrda. “Durante orkan Luis na 1995 el a pèrdè tur kos. E mester a konstruí tur kos di nobo i awor esaki ta sosodé.”

Pa orkan Irma a yega dieskuater marinir i militar èkstra di ehérsito na Sint Eustatius. Mas personal, material i otro rekurso ta na kaminda. No ta kla ainda kon grandi e daño ta riba e isla i si tin víktima.

Koriente a bai kasi riba henter e isla. Awor Hellebrand ta espesialmente preokupá pa José: “Tur kos ta fofo i kibrá. Si awor un orkan mas pasa, e daño lo ta inimaginabel.”

Bron: Extra

Tim di kalamidat di UTS preparando pa bai St. Maarten

WILLEMSTAD.- Un grupo di e tim di kalamidat di UTS ta preparando pa sali pa St. Maarten asina ku tin konektividat ku e isla. Esaki ta nesesario pa di tal manera nan por kuminsá traha riba e daño ku orkan Irma a kousa na e ret di telekomunikashon riba e isla.

Den deklarashon pa EXTRA, bosero di UTS Sra. Faina Haseth a indiká ku ta for di 6’or di mainta di ayera djárason nan tabatin informashon i kontakto ku St. Maarten. Despues di esei a pèrdè kontakto ku koleganan riba e isla. Esaki ta opvio debí na e orkan fuerte di Irma.

UTS na St. Maarten tambe a sufri daño na momentu ku algun mast di UTS a kai i komunikashon a kuminsá bai. E ret a keda afektá fuertísimo, segun Sra. Haseth. E mast a kai riba edifisio prinsipal di UTS, unda tur nan ekiponan tabata. Esaki a kousa ku e edifisio a yena ku awa. E restante chikí di ekiponan mester a “shut down” pa evitá esena molestioso i suavisá e daño i restablesé kontakto mas lihé posibel asina e situashon kalma. E situashon aki ta konta pa telefòn mobil.

E edifisio di UTS ta trahá kontra orkan kategoria 4, pero e mast a bin abou kai riba edifisio kousa e daño.

Pa loke ta trata sistema di Internet pa kas i negoshi i telefòn fiho, UTS a “shut down” e sistema tambe pa prekoushon pa evitá kualke situashon fèrfelu i salba ekiponan, Sra. Haseth a splika.

“Nos ta pendiente pa tim di kalamidat di UTS, esta un parti chikí pa bai St. Maarten ku marina. Marina no tin fecha pa bai debí ku nan ta monitòr i vigilá orkan Jose. Ora lo ta mas sigur, nan ta bai St. Maarten pa yuda restablesé komunikashon. Komunikashon ta masha importante. Nos tur tin famia, amigu i relashon di trabou na St. Maarten, Sra. Haseth a terminá bisando EXTRA.

Bron: Extra

“Nos ta tene kuenta ku masha hopi miseria”

WILLEMSTAD.- “Nos ta tene kuenta ku masha hopi miseria i masha hopi forma di daño”, komandante di Forsanan Marítimo Peter Jan de Vin (Area Karibense) ta bisa. Entretantu promé ku e orkan Irma a yega Saba, Sint Eustatius i Sint Maarten ya kaba a pone 145 militar i trahadó di Defensa.

Defensa ta manda 300 persona pa e tres partinan karibense di Reino, asina Ret Karibense a skibi ayera.

E islanan sa pidi sosten militar mas bia ora tin menasa di un orkan. E bia aki e sosten ta mas grandi ku normal. Ku ta nifiká ku lo yega mas material, militar i enfermero na e tres islanan. A yega un barku di karga i un barku di stashon ku dos helikòpter i boto di rùber ku ta nabegá lihé. “A base di e indikashon ku ta berdaderamente un orkan pisá, nos a adaptá basta lihé.”

E militarnan lo yuda ku òrdu públiko, inventarisashon di e daño i pa pèrkurá pa lugá pa e habitantenan por skonde.

E sosten militar por lo pronto lo ta na vigor te ku djadumingu. “Awor nos ta konta ku lo mas pió, pero naturalmente nos ta spera ku tur kos lo sali mihó di loke a pensa”, segun komandante De Vin. “Na e momentu aki ta difísil pa kalkulá, pero si djaweps òf djabièrnè nos yega na e konklushon ku e sosten no ta nesesario mas, e outoridatnan lo hasi e petishon ei tambe.”

Bron: Extra

Naschrift KKC