WILLEMSTAD.- ‘Nos ke sigui sirbi, nos ke sigui traha. Nos a demostrá nos ‘track record’ ku nos a produsí den tempunan difísil.” Asina lider di partido PAIS Alex Rosaria a bisa ayera mainta ora el a entregá su voto Kolegio Martinus de Porres na Santa Rosa.

Rosaria: ‘Ta fásil ora bo ta hasi yen kos ora bo ta den tempunan bon. Ta ora bo ta den lamannan brutu bo mester di bon kapitannan. Esei nos a demostrá. Anto p’esei nos ke sigui traha pa e pais dushi aki.” Segun lider di partido PAIS: ‘Dia di elekshon ta un dia importante pa nos demokrasia. Esaki ta un ekspreshon di nos demokrasia pa ban vota. P’esei mi ta spera ku tur hende ta hasi uso di nan derechi pa voto. Laga nos keda hende demokrátiko. Pa partido PAIS dia di elekshon ta hopi importante. Nos tabatin kuater aña den gobièrnu. Awor aki nos ke pa pueblo husga nos tempu ku nos tabatin den gobernashon i nos ta ban p’e.”

Rosaria a splika ku kampaña ‘ pa su mes personalmente tabata hopi difísil dor ku mi tabatin dos pèrdida sensitivo den mi famia. Mi mama i mi ruman muhé mas chikitu a fayesé resientemente. Esaki sigur a afektá e manera ku mi a hasi kampaña. Pero mi tin pa ‘back me up’. E tim di PAIS tabata importante pa esaki. I ‘all by all’ mi ta kontentu i satisfecho ku e manera ku e kampaña a keda hibá.”

Rosaria: ‘ For di komienso mi a bisa ku e meta ta ku por lo ménos nos lo mantené e kuater asiento ku nos ta tin. Den 2012 nos a haña 3 asiento i 1 asiento komo restzetel. Esei ta nos meta.”

Bron: Extra