WILLEMSTAD.- Ruben Suriel, konosido aktivista sosial, no sa ta ken ta Frente Sivil. Frente Sivil a pone diferente kònteiner atrobe na sitionan stratégiko di Kòrsou pa konsientisá e votador pa vota segun nan konsenshi otro siman.

Banda di esei e kònteinernan ta presentá tambe un imágen di The Three Stooges, aparentemente refiriendo na e lidernan di e tres partidonan MFK, PAS i Kòrsou di Nos Tur. Frente Sivil ta insistí ku tin un akuerdo entre e tres partidonan aki pa traha huntu despues di elekshon. E kònteinernan ta basá riba mesun prinsipio ku a usa den e kampaña di 2012 ku e tempu ei a usa e lema Ban Gana Baka.

Tin hopi pregunta ta ken a laga pone e kònteinernan aki pero meskos ku tur organisashon polítiko ku ta poniendo un gran kantidat di bandera i bòrchi, Frente Sivil a disidí ku e tambe a bula den e kampaña aki. Pero no ta masha kla ta ken ta tras di e kampaña aki i ken ta finansiá e grupo. Den pasado Onnie Gonett tabata bosero di Frente Sivil pero tin basta tempu kaba ku e no ta den públiko.

Den un entrevista na radio e siman aki a trata di pone Suriel den e klup di Frente Sivil pero el a rechasá esei kategórikamente. Ta bèrdat ku na 2012 den e kampaña el a remplasá Gonett ku tabata malu pero e no sa di nada mas di e organisashon. Probablemente a bruha Suriel su organisashon Akshon Sivil ku Frente Sivil. Einan e konfushon ta sintá i a puntra Suriel si e sa algu di loke ta pasando. Di tur manera esnan ku a hasi e entrevista no a logra changa Suriel pa e bisa ta ken ta Frente Sivil komo ku, segun e ta bisa, simplemente e no sa esei. El a defendé si ku fervor e akshonnan di Akshon Sivil, entre otro pa loke ta trata e enkuesta sivil ku a tene ku ta impulsá pa e organisashon aki. E enkuesta sivil a determiná ku mas ku 400 mion florin a “evaporá” na e kompanianan di gobièrnu Refineria di Kòrsou i Aqualectra durante e periodo 2010/2012. “Nos organisashonnan hañando yudansa pro deo di 6 hurista spesialisá. Nos no tin sèn pa loke nos ta hasi”, asina el a bisa.

Suriel a komentá tambe ku mester fortifiká Ministerio Públiko ku un òf mas akountent i tambe huristanan ku sa lei komersial i privá. Awor aki ta fortifikando e sektor aki konsiderando e kantidat dia pa dia mas grandi di denunsia ku OM ta haña di labamentu di plaka, krímen organisá i otro aktividatnan froudulento den e sektor aki. Suriel a rechasá tambe ku su grupo ta selektivo, por ehèmpel pa loke ta trata Banko Sentral. “Nos no ta traha riba terenonan ku ya kaba otronan ta trahando. Nos sa ku Fundashon Kòrsou Outónomo i Fuerte ya kaba ta traha riba e tereno ei. Di kon gasta energia na un kos ku otronan ya kaba ta atendé?”, asina el a puntra.

Di tur manera e emisora ku a aserká Suriel no a logra haña sa ta ken ta Frente Sivil di manera ku faltando un siman pa elekshon ainda ta un misterio ta ken a pone e kònteinernan kant’i kaminda.

Bron: Extra