WILLEMSTAD,- Lider di frakshon di MFK Gerrit Schotte ta lamentá deklarashon ku presidente di Parlamento Giselle Mc William a hasi resientemente den EXTRA. Mc William a splika ku Schotte no ta interesá pa reuní ku su persona pa deliberá tokante situashon den Parlamento.

Schotte: “Sra. Mc William a yama mi na telefòn. Nos a kombersá, entre otro tokante instalashon di komishon di Smart Zoning. Despues di e kombersashon Mc William a aktua den un reunion di Parlamento komplementu kontrali. El a ninga di tuma akshon pa lanta un komishon di Smart Zoning manera mayoria di Parlamento a aprobá aña pasa. E mester sa ku esaki no ta korekto”.

E manera di aktitut di Mc William por tin konsekuensia hopi grave p’e, segun Schotte. Schotte a splika ku eks-presidente di Parlamento Mike Franco di partido PAIS ‘pa kuater aña largu’ a ninga di atendé ku petishon di MFK na un manera korekto. Semper el a tarda pa yama reunion basá riba petishon di MFK, semper el a traha kontra nos. Awor PAIS no ta representá den Parlamento mas”. Segun Schotte Mc William no mester lubidá esaki.

“Despues di su desishon pa ninga desishon di mayoria di Parlamento I no tuma akshon pa lanta komishon di Smart Zoning, m’a splika presidente di Parlamento ku bou di sirkunstansia aktual mi no ta kere ta oportuno pa nos ta sinta pa deliberá”. Segun Schotte MC William su aktitut ta demotivá parlamentarionan.

Bron: Extra