WILLEMSTAD,- Segun diferente fuentenan partidonan MAN, PAR, PNP i Un Kòrsou Hustu ayera a ofresé partido Movementu Progresivo di dòkter Marilyn Moses un kartera pa huntu forma un gobièrnu nobo.
Supuestamente a ofresé partido di Moses e kartera di Salubridat.
Moses mes ayera anochi a splika ku su partido no a tuma niun desishon pa forma un gobièrnu. ‘Te ainda tur kos ta ‘status quo’.’ Na mesun momentu e no ta desmentí ni konfirmá ku e ta enbolbí den kombersashon pa un gobièrnu nobo.
Manera ta konosí djasabra partidonan MAN, PAR, PNP i Un Kòrsou Hustu a firma un akuerdo di disponibilidat pa forma un gobièrnu nobo. Parlamentario Eduard Braam a duna di konosé ayera ku e ta sali for di PAR i ta independiente. E partidonan a buska un èkstra asiento. Movementu Progresivo tin un asiento den Parlamento nobo.
Lider di partido PAR Zita Jesus-Leito ayera a splika ku el a haña karta di dòkter Eduard Braam. ‘Nos a tuma nota di e karta. E punto ku a asombrá mi ta ku kuantu rabia e tin. Nos a papia durante e wikènt. E tabata basta rabia riba diferente punto. Mi a bis’e pa sigui kombersá kuné ora e yega Kòrsou bek. Pasobra segun mi nos mester sirbi Kòrsou na un manera mas mihó.’ Pero Braam a entrega su karta djaluna mainta. Ku e karta el a duna di konosé ku e no ta miembro di PAR mas i lo sigui komo parlamentario independiente.
Segun lider di partido MAN Hensley Koeiman paso di Braam pa bira independiente na promé instansia ta un asuntu di partido PAR. ‘ Nada no a kambia pa partido MAN. Importante ta pa nos ta den gobièrnu i traha pa transparensia, bon gobernashon i kombatimentu d i korupshon. Nos no ta wak pa otro partido. Formashon ta algu kompliká.’
Bron: Extra