WILLEMSTAD.- ‘Aparentemente ami i Marvelyne Wiels a bai Miami pa lanta 300.000 $ for di un kuenta di banko ku ami ku Helmin supuestamente tabatin na Miami. Te awe ni fiskal Rip, ni Ministerio Públiko, ni RST, ni niun hende no por produsí e kuenta ei. Bosa di kon? E no ta eksistí.”

Asina eks- minister di Hustisia di Kòrsou i aktual parlamentario Elmer Wilsoe a splika ayera durante rueda di prensa den sede di Pueblo Soberano. Ku e rueda di prensa Wilsoe a reakshoná riba e lèkmentu siman pasá di dokumentonan tokante investigashon di hende ku ta responsabel pa asesinato di Helmin Wiels. Wilsoe ta menshoná den e dokumentonan komo sospechoso.

Wilsoe a splika ayera ku el a keda interogá pa promé bia riba dia 17 di yüli 2014 den kuadro di posibel embolbimentu den e asesinato di Helmin Wiels, dia 5 di mei 2013. ‘Interogashon a dura 2,5 ora i tabata tokante kosnan sosial so.” Asina Elmer Wilsoe a deklará ayera. ‘Ora mi a bai e ulandes di RST ku ta enkargá ku investigashon a bisa mi ku “mañan nos ta bini ku e echosnan di kua nos ta pensa bo ta kulpabel.” Segun Wilsoe el a respondé den un tono normal: ‘ik kijk er naar uit.’

Wilsoe: ‘En todo kaso e siguiente fecha, segun mi tabata 20 di yüli 2014, nos no a papia riba echos tampoko.” Mas aleu Wilsoe a splika: ‘Ami nunka tabata sa ku RST ta kere den spiritismo.” Wilsoe ta splika ku RST a bin ku un video ku partido Pueblo Soberano mes a graba den nan sede durante un anochi di informashon, ora un portrèt di Helmin Wiels a kai for di un mesa patras di Wilsoe. Un fèn grandi a bula e portrèt. Wilsoe: ‘Un tal mener Aubert Wiels a bisa RST ku na Westpunt ora un portrèt di un defuntu kai ta un indikashon. I aparentemente Ivar Asjes, ku a nase na Rotterdam, tambe ta kere den esei.” Segun Wilsoe RST ni den aña 2014 ni despues no a presentá niun prueba tokante embolbimentu di su persona den asesinato di Helmin Wiels.

Bron: Extra