WILLEMSTAD.- Servisio di Seguridat di Kòrsou (VDC) parse lo a duna un konseho negativo tokante Kenneth Gijsbertha komo minister den e gabinete nobo. Asina fuentenan a splika EXTRA ayera anochi.

Manera ta konosí partido MAN a proponé Gijsbertha komo minister di Finansa.

Ayera nochi EXTRA a purba di haña reakshon di sr. Gijsbertha, i tambe lider di partido MAN Hensley Koeiman i presidente di partido Emile Wallé, pero no a haña kontakto.

Gijsbertha ta formador di e gabinete nobo di MAN, PAR, Pueblo Soberano i PNP i a pasá screening komo formadó, pero pa minister e mester pasá un proseso di screening mas profundo.

Segun fuentenan, te awor ta wanta e konseho definitivo di VDC pa minister Ruthmilda Larmonie-Cecilia di Pueblo Soberano. Larmonie-Cecilia te ainda ta minister di Desaroyo Sosial, Labor i Bienestar i a keda proponé komo minister di Gobernashon, Planifikashon i Servisio Públiko pa e gabinete nobo. Motibu pa VDC ta wanta e konseho tin di aber ku un rapòrt ku Kontrolaria General resientemente a publiká.

Segun e rapòrt di Kontrolaria General den aña 2014 i 2015 den diferente ministerionan kompromisonan finansiero no a keda hasí konforme e outorisashon otorgá. Larmonie-Cecilia ta un di e ministernan ku a firma kantidat grandi di ‘bestelbon’ sin outorisashon. Ta parse ku te ainda no ta kla ku investigashon.

Hensley Koeiman, proponé komo minister-presidente nobo pa e gabinete nobo, supuestamente tabata un kaso di diskushon pa VDC, pero na final segun nos fuentenan lo a pasa proseso di screening tòg. Motibu di e diskushon tabata e supuesto embolbimentu di Koeiman den e promoshon di trabou pa su kasá, ku ta traha pa gobièrnu.

Bron: Extra