…Rapòrt ta skirbi pa apelashon di kaso Babel…

WILLEMSTAD,- Segun un investigashon di organisashon ‘Marketing Counterintelligence’ un grupo di hende na Kòrsou i pafó a krea kondishon pa kambio gobièrnu di Schotte den aña 2012.

E rapòrt ta skirbi riba órden di tim di defensa di Schotte den kuadro di apelashon di kaso Babel. Segun e rapòrt gran parti di e hende investigá ta responsabel pa ‘ limitá abilidat pa Kòrsou krese i bira un entidat kompletamente outónomo’. Segun e rapòrt Kòrsou ta konosé un grupo ku tabatin ‘intenshon i kapasidat pa malinformá pueblo i krea un sentimentu kontra Schotte’. Segun e rapòrt esaki a stroba trabou di gobiernu- Schotte.

Gran parti di e personanan investigá te ainda ta aktivo den mundu di prensa i polítiko. Segun e rapòrt e grupo tabata dediká na e meta pa stòp e gobièrnu di Schotte.

Den e kaso Babel korte ta haña probá di “valsheid in geschrifte” i falsifikashon di dokumentonan. Korte tambe ta haña ku komo ámtenar, Gerrit Schotte a laga su mes ser kumpra dor di regalonan i sèn di Francesco Corallo. Manera ta konosí dia 11 di Mart wes a kondená Schotte na 3 aña prizòn i 5 aña ku e no por partisipá na elekshonnan parlamentario.

Te ainda no ta konosí ki dia ta trata apelashon den kaso Babel. E apelashon lo no tuma lugá promé ku e elekshonnan di dia 30 di sèptèmber awor.

Ku e tardansa aki, e veredikto di korte no tin konsekuensia pa lider di MFK Gerrit Schotte i e lo enkabesá lista di su partido ku lo mester presentá dia 9 di ougùstùs awor normalmente.

Bron: Extra