WILLEMSTAD.- ‘E situashon na St. Maarten ta hopi serio. Nos di komersio tambe ke mira kon nos por yuda. Nos ta kere ku tin hopi hende ku ke yuda. E grupo aki ke yuda pa rekuperashon di St. Maarten, en espesial e parti ekonómiko.’

Asina Billy Jonckheer, presidente di Kámara di Komersio di Kòrsou a splika ayera durante un rueda di prensa na unda representantenan di diferente organisashonnan a firma un ‘Protokòl pa e esfuerso di rekuperashon di St. Maarten, Statia i Saba’.

Ayera e protokòl a keda firmá dor Herman Behr, Rose Boevé, Arthur Adams, Vishal Oegdjaghir, Miles Mercera, Rene Römer, Billy Jonckheer, Rogier van den Heuvel i Marius van Noort. Nan ta representá Asosiashon di Komersio i Industria (VBC), Asosiashon di Bankeronan Internashonal, Curaçao International Financial Services (CIFA), Curaçao Hospitality Association (CHATA), Dutch Caribbean Securities Exchange, Kámara di Komersio, Orden di Abogado i Scheepvaart Vereniging Curaçao.

E inisiadó di e lansamentu di e protokòl, i na mesun momentu, e promé miembronan di e ‘SSS Recovery Committee’ ta e siguientenan: Eric de Vries, Billy Jonckheer, Dave Liqui-Lung, Henk de Zeeuw i Rose Boevé. Intenshon di inisiadónan ta ku mas organisashon i kompanianan lo firma e protokòl i asina yuda pa rekoudá mas fondo pa rekuperashon di St. Maarten, Statia i Saba.

Bron: Extra