WILLEMSTAD.- Ta resultá ku e trio sospechoso ku resientemente Kòrsou i Sint Maarten a entregá na Merka ta detené den e mesun prizòn di seguridat máksimo ku e notorio trafikante di droga mehikano El Chapo Guzmán.
Informashonnan ku EXTRA a haña ta bisa ku e trio Rietwijk, Felicia i Koeiman ta kedando riba e promé piso di e prizòn di seguridat máksimo na New York, miéntras El Chapo ta kedando riba e di 5 piso.
Pa detenshon di El Chapo Guzmán tin medidanan estrikto di seguridat. E echo ku ta ten’é awor aki na un piso haltu ta pasobra el a yega di hui den forma espektakular tempu ku e tabata será na México. Na e okashon ei el a koba un tùnel largu bou di e prizòn ku yudansa di tersera pa e hui. A rekaptur’é i despues di un huisio amplio finalmente e entreg’é na Merka pa aktividatnan di trafikashon di droga kombiná ku mortonan violento okashoná pa su kartel di Sinaloa na México. E ta kore riesgo di un kastigu di bida largu.
Awor aki El Chapo Guzmán ta fuertemente kuidá por sierto huntu ku algun sospechoso importante di trafikashon di droga di Merka i hemisferio. Ta den e prizòn aki e trio ta detené pendiente nan huisio na Merka. Nan tin kontakto ku eksterior pero tur moveshon ta estriktamente vigilá den e prizòn aki. Ta kontrolá i vigilá tur movida ku ta inkluí tambe yamadanan di telefòn ku nan haña.
EXTRA a haña konfirmashon tambe ku e tiramentu ku tabatin na prizòn resientemente i ku awor aki ta den investigashon ta relashoná ku e ekstradishon di e trio pa Merka. E tiramentu a tuma lugá den oranan di mardugá riba e dia ku a manda e trio Merka. “E tiramentu aki kaminda a laga un gran kantidat di kartucha atras i ku a spanta wardadónan di prezu no ta kasualidat. E idea tabata pa e hendenan aki keda Kòrsou algun siman mas. Aparentemente nan a haña informashon ku e avion speshal ku a bin buska nan a yega i hendenan ku ta den nan sírkulo a kometé e akto aki”, asina investigadornan ta bisa.
No ta masha kla kua kastigu e trio ekstraditá pa Merka ta kore riesgo di haña. Ta konosí si ku Merka no ta hasi wega.
Bron: Extra