Extra | Spesialista Fa-Si-Oen buskando sosten di koleganan

Dr. Patrick Fa Si Oen (derde van links) | Foto: DSK

WILLEMSTAD.- Ta parse ku e kaso di spesialista Fa-Si-Oen lo bai kaba den korte. Segun informashonnan e ta pensando pa entamá un huisio sumario awor ku e no ta haña klaridat riba su situashon komo spesialista.

Gobièrnu a duna un splikashon amplio siman pasá riba kiko ta bai pasa den e kaso aki. A splika ku Minister enkargá ku Salubridat, Medio Ambiente i Naturalesa atraves di su Ministerio a partisipá na e gruponan di profeshonal den kuido ku ta inisiá dos trayekto den kuadro di esfuersonan pa garantisá kuido di kalidat na pueblo di Kòrsou. Ta trata di un trayekto riba término largu pa finalisá implementashon di e asina yamá lei BIG (wet op de Beroepen in de individuele Gezondheidzorg) ku ta pendiente for di 2009. Banda di esei a menshoná un trayekto riba término korto pa inventarisá e grado den kua tur profeshonal rekonosé pa lei den kuido, ta kumplí ku loke mínimo ta rekerí pa nan ehersé nan funshon.

E inisiativa di Minister i Ministerio ta basá riba un ouditoria ku a keda realisá pa Inspekshon di Salubridat, den koperashon ku e grupo di profeshonalnan den sirugia. Ta bon enfatisá ku aki ta trata di akshonnan nesesario pa garantisá komunidat ku e profeshonal ta kumplí ku e loke lei ta preskribí ku e mester tin na preparashon. Na mes momentu ta hasi bon kla na e profeshonal kiko ta keda sperá di dje pa loke ta su preparashon básiko.

Ta bon enfatisá ku aki Inspekshon di Kuido, a base di su outoridat outónomo, ta sigui hasi su trabou manera semper di vigilá e kalidat di e kuido ku ta keda duná i ku e kalidat di kuido no ta den diskushon. E gruponan di profeshonal ku ta keda preskribí pa Ordenansa nashonal ta dòkter, dentista, partera i botikarionan.

Aparentemente e splikashon no ta sufisiente tur kaminda. Pa dr. Fa-Si-Oen aparentemente tampoko. Ta resultá ku el a aserká diferente kolega pa sosten’é ku un karta pa e bai un huisio sumario. Direktiva di Asosashon di Dòkter di Kas a informá su miembronan den fin di siman di a tuma nota di e petishon di e spesialista pa e haña sosten.

Awor aki direktiva di Asosashon di Dòkter di Kas, enkabesá pa dr. Wallid Elhage ta buskando informashon riba e kaso aki. A base di e informashon aki lo informá dr. Fa-Si-Oen kiko e gremio ta pensa di e kaso aki.

EXTRA a komprondé ku tin algun miembro ta di akuerdo ku gremio mester manda un mensahe bon kla ku por a atendé e asuntu aki di otro forma. Otronan sinembargo ta kere ku no mester meskla den e diskushon aki. No ta konosí ki dia e huisio sumario lo tuma lugá.

Bron: Extra

Een Reactie op “Extra | Spesialista Fa-Si-Oen buskando sosten di koleganan

  1. Handtekening aktie kan niet gebruikt worden om tegen de BIG wet te ageren,met moet de wet respecteren anders wordt het een rotzooi waar niemand meer zich aanhoud.Fa-Sie-Oen kreeg 2 weken om zijn zaken te regelen (die zijn allang voorbij) hij ging ermee acoord nu een rechtzaak? Niemand zit op zo’n chirurg? te wachten.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *