WILLEMSTAD.- Kontrali na informashon ku a sali den medio di komunikashon, Fundashon pa Finansiamentu di Estudio (SSC) ta usa tur e supsidio ku e ta risibí di Gobièrnu pa finansiá studiante.

No ta korekto ku gerensia di SSC lo ta usa plaka ku ta destiná pa studiante, pa otro kos. No ta korekto tampoko ku gerensia di SSC lo ta intimidá trahadónan i obligá nan aktua kontra regla eksistente. Asina EXTRA por a komprondé for di un kombersashon ku sra. Margit de Freitas, direktora di SSC.

Segun e instituto, for di momentu ku e gerensia i Hunta di Komisario aktual a kuminsá ku su trabounan na SSC na 2011 el a introdusí un maneho responsabel ku tin komo meta pa laga e organisashon kumpli ku reglanan moderno di un instituto finansiero. Esaki a enserá entre otro ku mester a introdusí diferente ‘checks and balances’ ku no tabata presente den e organisashon.

Esaki a duna e resultado antisipá, i asina por mira ku pa promé biaha den historia di SSC e organisashon a logra kresementu di su kobransa di un forma struktural. Asin’ei tambe e organisashon a logra outomatisá su prosesonan di tal forma ku a eliminá diferente riesgo indeseá. Pa loke ta trata e servisio ku SSC mester brinda di akuerdo ku e maneho di Gobièrnu, SSC a logra introdusí e posibilidat pa risibí finansiamentu pa studia den region, a introdusí un preparashon hopi mas intensivo di e studiantenan ku ta bai studia pa yuda nan traspasá e fase di ta un alumno i bira un studiante lokual a sòru pa mihó resultado akadémiko di e studiantenan, espesialmente esnan na Ulanda. Ademas di esei gerensia a sòru pa un mehorashon konsiderabel di su servisio pa studiantenan na Ulanda.

Pa loke ta trata sènnan ku falta pa finansiá studiantenan den region, esaki ta bin komo ku Gobièrnu no a presupuestá e suma di supsidio di 4 mion pa e aña aki, siendo ku tin un palabrashon ku Gobièrnu lo a hasi esaki. For di 2014, Gobiernu a subi e supsidio pa Region ku 4 mion, pero e aña aki no a hasi esaki.

E informashon tokante un miembro di personal ku kua SSC a terminá relashon di trabou, tambe ta inkorekto. No ta asina ku SSC lo mester bai paga e persona aki un mion. SSC tin un permit pa terminá e kontrato di trabou i huntu ku esaki mester paga un suma, pero esaki ta leu for di un mion. Pa motibunan étiko SSC no ta divulgá informashon interno di personal. P’esei SSC ta limitá su mes solamente na bisa ku komo un organisashon responsabel hamas lo pidi pa retirá un personal ku ta traha bon simplemente pasombra e ta krítiko. Si kuminsá ku e trayekto pa retirá un personal i haña ‘ontslagvergunning’ pa hasi esaki, ta pasombra tin motibunan hopi bálido pa esaki.

SSC ta raportá regularmente na Gobièrnu i ta entregá tur aña su sifranan anual ouditá pa un akountant sertifiká. Pa kita tur insinuashon i informashon eroneo for di mesa ku na SSC lo tin kosnan ta sosodé ku ta kontra regla, SSC a enkargá su akountant eksterno for di aña pasá pa laga hasi un asina yamá ‘rechtmatigheids-onderzoek’ na SSC i Hunta di Komisario di SSC mes a pidi SOAB for di komienso di e aña aki pa laga hasi un investigashon na SSC.

Bron: Extra