WILLEMSTAD.- Meskos ku otro partidonan eksistente, ku tin representashon den Parlamento i ku ta bai elekshon dia 28 di aprel próksimo, MAN tambe a bai ‘polish’ i fortifiká su lista.

E partido blou ta bai presentá tres ‘top gun’ den personanan di Steven Martina, Eugene Cleopa i Armin Konket. Esei EXTRA por a komprondé for di resultado di un reunion di konseho di partido ku a tuma lugá ayera nochi. Den e reunion ei a presentá diferente proposishon na konseho di partido, ku na su turno mester a duna su aprobashon.

Primeramente partido MAN a presentá sr. Steven Martina riba lista, por sierto number 2. Mester bisa ku na diferente okashon MAN a hunga ku e idea di presentá Martina, kende ta yu di e eks lider polítiko Don Martina, riba lista. E biaha aki asta nos a komprondé ku kosnan a bai asina leu ku kier a hasi algu radikal, den e sentido ku kier a presentá Martina komo ‘lijsttrekker’, pero manteniendo Hensley Koeiman komo lider polítiko.

Seguidamente lo fortifiká e lista ku  e “Gai di tur ora”, Eugene Cleopa. Manera ta konosí e ròl di Cleopa tabata klave na 2012. E kiebro ku MAN, ku e tempu ei tabata liderá pa sr. Charles Cooper, tabata prinsipio tambe di e kaida di gabinete Schotte. Den e siguiente elekshon Cleopa a uni su mes na filanan di partido PAIS unda el a proba su balor den polítika. Na e okashon ei el a hasi su entrada den Parlamento pa medio di votonan preferensial, ku mas di 2.300 voto. Sinembargo den e elekshon di òktober 2016 e kantidat di voto riba su persona a baha konsiderablemente te na algu mas ku 600. Kombiná ku e echo ku Charles Cooper i su grupo a bandoná filanan di MAN, kual a yuda e partido alkansá 4 asiento, tabata e señal pa Cleopa konsiderá pa bai kas bèk. Cleopa kende tin su lombrishi derá serka MAN, a demostrá su kualidatnan komo un disipulo di e legendario Don Martina.

Manera nos a introdusí bisando, Armin Konket tambe lo ta un dje yunan ku ta bai kas bèk. Ta konosí tambe ku Konket a bandoná filanan di e partido pa motibu ku e no tabata riba e mesun liña mas ku direkshon di e organisashon. El a  bandoná MAN na 2005 i sinku aña despues a forma parti di PAR, kual partido el a representá te na 2016. Den elekshon di òktober último Konket a keda for di kontienda ya ku e no por a haña su mes den loke e partido tabatin di ofresé.

Bron: Extra

“A yega momentu pa kumpli ku bo deber patriótiko”

WILLEMSTAD.- “A yega e momentu pa bo kumpli ku bo deber patriótiko”. Esei tabata palabranan di su tata, e legendario Don Martina, ku a stimulá Steven Martina pa hasi su entrada ofisialmente den polítika pa yuda pais. E lo ta un sakrifisio, pero den bida tin kaminda ku bo tin di hasi sakrifisio pa interes general. Asina Steven Martina a duna di konosé na EXTRA den un entrevista ayera na final di e reunion di konseho di partido den kual a anunsi’é i ratifik’é komo eksponente number-2 riba lista di MAN.

Den su deklarashonnan pa EXTRA Martina a bisa ku, Kòrsou ta riba un krusada masha importante den su desaroyo. Kòrsou ta rekerí lidernan ku tin kapasidat i integridat pa guia e lugá aki den e rumbo korekto pa kondusí na desaroyo i bienestar pa e komunidat. I den esaki a bini un yamada dramátiko for di komunidat riba su persona pa e duna su kontribushon, anto el a duna oido na esei, pasobra e ta konsiderá esaki su deber patriótiko. El a disidí di bai yuda fortifiká liderato di MAN i fortifiká e pueblo den kaso ku esaki honra e partido ku e konfiansa pa un próksimo gobièrnu nobo.

Enkabesá lista?

Tabatin rumornan insistente ku Martina lo a ser presentá asta pa enkabesá e lista di MAN. Riba e partikularidat aki el a deklará ku en bèrdat tabatin e deseo ei, pero semper tin di respetá prosedura i reglanan di órganonan di partido. Pero p’e e posishon riba lista no ta importante, ya ku e  votadó lo sa di hañ’é riba e lista ei na momentu ku e bai urna pa e duna su kontribushon.

Pa loke ta su enfoke den e próksimo kampaña, Martina a bisa ku su punto di lansa lo ta ku, e lo splika rònt Kòrsou i tur kaminda ku e por di e potensialnan ku Kòrsou tin pa desaroyo, partikularmente e desaroyo energétiko, den refineria, ku lo tin di forma e base fundamental pa futuro desaroyo ekonómiko. I esaki ta un aria ku e tin amplio eksperensia i konosementu aden. Anto dor di fomentá e desaroyo ekonómiko tan nesesario aki lo por redusí desempleo, tambe krea e fondonan nesesario pa e reforma sosial ku a keda atras e último añanan aki, ya ku a konsentrá hopi riba reforma di finansa públiko. “Mi kier promové e reforma sosial pa e pueblo tambe haña e bienestar ku e meresé i ku a keda atras”, segun Martina.

Influensia di Don Martina:

Nos a puntra Steven si su tata Don tabatin influensia riba su desishon, i el a splika ku Don ta su konsehero prinsipal den esaki. Un hòmber ku hopi eksperensia i hopi sabiduria den polítika.

Naturalmente el a konsulta su tata promé ku el a dal e paso aki ku ta bai nifiká un sakrifisio personal grandi pe. Papa Don a dun’é di konosé ku “a yega e ora pa bo kumpli ku bo deber patriótiko”.

Segun Steven, e ta un sakrifisio, pero den bida bo tin di Sali for di e zona di komfort si bo ke nifiká mas di loke bo ta hasiendo pa pais.

Bron: Extra