Extra | Suzy Camelia-Römer fadá di tantu publisidat negativo

Suzy Camelia-Römer fadá di tantu publisidat negativo | Vigilante

WILLEMSTAD.- Suzy Camelia-Römer ta realmente fadá ku tantu publisidat negativo pa loke ta trata su persona i su kasá Carl Camelia. No mas ku resientemente un profesor a bolbe saka yen di informashon inkorekto riba e Akademia di Polis ku Carl Camelia ta desaroyando.

“Yen di informashon ku no ta kuadra ku bèrdat. E meta ta pa stroba formashon di un gobièrnu nobo”, asina sra. Camelia-Römer a bisa relashoná ku e publikashon aki i otronan ku tabatin den último dianan.

Sra. Camelia-Römer a refutá tambe ayera e alegashonnan ku e lo no ta ministeriabel pa motibu di e kaso di Blue Factor ku a bai bankrut resientemente i a laga un debe kuantioso atras. E eks-minister i aktual lider polítiko di PIN tabata parti di e kompania i a sali for di 2014. “Tur kaminda por sertifiká esei inkluso na Kámara di Komersio. Mi no tin nada di aber mas ku e kompania. Despues di esei mi a bai traha na C-Post i tur hende sa esei. Despues di C-Post mi a bira minister pa kua mi a pasa na tres diferente okashon tur screening”, asina e lider polítiko a bisa den forma disgustá.

E lider polítiko ta kandidato pa bira minister di Salubridat Públiko, Medio Ambiente i Naturalesa pa kua ya kaba el a establesé diferente kontakto. Ayera tabatin diferente informashon ta sirkulá ku e eks-mandatario ta asina disgustá ku aparentemente no kier sigui mas na e puesto. Otro fuentenan a sigurá sinembargo ku sra. Camelia-Römer no ta e tipo di hende aki ku ta laga otro determiná p’e kua paso e mester tuma.

Si e mandatario a bisa ayera ku mester sigui e rekomendashon di Iglesia Katóliko pa un komishon speshal verifiká informashonnan ku ta sirkulando i ku ta hasi daño na nòmber di hende. “Loke ta pasando awor aki pa trata di stroba formashon di e gobièrnu nobo meskos ku a hasi biaha pasá. Obispado a sugerí pa lanta un komishon speshal pa atendé e kosnan aki. Mi ta di akuerdo ku esei pasobra tin biaha bo keda splika i ta sigui insistí pa trese kosnan sin base pa daña nòmber di hende”, asina el a duna di konosé.

Bron: Extra

2 Reacties op “Extra | Suzy Camelia-Römer fadá di tantu publisidat negativo

  1. Ohhhhh suzy ahinda nota basta ba horta e pueblo den gabinete maria liberia peters. Perhudika korsouw ku parker. Drecha bo kushina na bo homber puesto esnan ku no saken bota laga mi konta nan bo historia.

  2. yolanda Specht QUirindoongo

    si no tin nada e SRa no mester fada ni rabia….paso kandela semper lo paga di su mes….no tin ni obispado ni nada pa bisa lo kontrario si e SRa ta liber di tur akusashon…e lo tin ku keda trankil “el q no debe, no teme”

Geef een reactie

Het e-mailadres wordt niet gepubliceerd. Vereiste velden zijn gemarkeerd met *